Zabalik da Fagor Herrigintza lankidetza programaren deialdi berria

Irailaren 1ean abiarazi du Fagor Taldeak Fagor Herrigintza lankidetza programa, Euskal Herri hobe baten aldeko lanean ari diren proiektuak laguntzeko. Gizarte eragileek irailaren 30era arte dute euren ekinbideak aurkezteko aukera. Ohi moduan, hiru laguntza (60.000 eurokoa, 40.000 eurokoa eta 20.000 eurokoa) emango ditu Fagorrek, 120.000 euro, osotara. Fagor.eus webgunean aurkeztu beharko dira proposamenak, gutxienez, euskaraz. “Fagorrek iraunkortasuna du ipar eta jardun modu. Komunitatea ahalduntzeko eta indartzeko bitartekoak eskaintzea funtsezkoa da bide horretan. Are: gizarte hobe bat eraikitzeko egiten duten lana aitortzeko modu bat da”, azaldu du Aritz Otxandiano Kanpo Fagor Taldeko Iraunkortasun arduradunak.

Egitasmoak aurkezteko epea bukatuta, aurrez ezarririko oinarrien araberako balorazioa eginda, Fagorreko kooperatibetako bazkideek azaroko lehen hamabostaldian aukeratuko dituzte Fagor Herrigintza bidez lagunduko diren hiru proiektuak -puntu gehien eskuratu dituzten egitasmoak pasako dira bozketa fasera-. Azkenik, abenduaren 16an argitaratuko lirateke Fagor Taldearen web orrian eta hedabideetan zeintzuk liratekeen laguntzak jasoko lituzketen hiru proiektuak.

Hirugarren aldia

Aurtengoa, hirugarren aldia du Fagor Herrigintza lankidetza programak. 2022an sortu zen, euskal gizartean erroturiko ekinbideak laguntzeko eta eurekin elkarlanean jarduteko. Haren bidez, Garapen Iraunkorreko Helburuei erantzun propioa eta berritzailea ematea helburu duten proiektuak bultzatu nahi ditu Fagorrek. Asmo horrekin, Biolur nekazaritza ekologikoaren aldeko elkartea (60.000 euro), Gipuzkoako Kirol Egokituen Federazioa (40.000 euro) eta Iñurri minbiziaren akonpainamendu, formazio eta dibulgazioan ikuspegi feminista eta eraldatzaile batetik diharduen elkartea (20.000 euro) lagundu zituen 2023an.