Irakurriena
- 1. “Abentura zirraragarria izan da”
- 2. Hirekin industria jasangarriko zentro berritzailea inauguratu du Mondragon Unibertsitateak
- 3. Iñigo Laskurain Pagaegi, MONDRAGONeko lehendakariorde eta Automozio Dibisioko zuzendari orokor berria
- 4. Vicente Atxa, MONDRAGONeko lehendakariorde eta Ezagutza Dibisioko zuzendari orokor berria
- 5. “Definitu dugu zer ekarpen egin nahi diogun gizarte honi gure ikasleen bitartez”
- 6. Imanol Oleaga Mendiaratz, Domusa Teknikeko zuzendari nagusi berria
- 7. Orkli Biotz enpresan sartu da % 11,11ko parte-hartzearekin
- 8. Danobatgroup-ek 337 milioi euroko fakturazio historikoa izan du, %90 nazioarteko merkatuetan
- 9. Dikarrek bere ekoizpen planta modernoa inauguratu du Arrasaten, etapa berri bati ekiteko
- 10. MONDRAGONen Komunikazio Foroaren edizio berria egin dute
Urtzi Amiano: "Erreferentziazko futbol txapelketa bilakatu gara"
![Card image cap](https://www.tulankide.com/eu/urtzi-amiano-erreferentziazko-futbol-txapelketa-bilakatu-gara/@@images/04a4eaac-9796-43a1-8f74-624f124389e3.jpeg)
Emakumezkoen Gabonetako Futbol Txapelketaren hamalaugarren edizioa jokatu da aurten. Pozik emaitzarekin?
Oro har, oso pozik gaude. Txapelketa ederra izan da eta guztira 450 neska izan ditugu lehiatzen. Edozelan ere balorazioa gazi gozoa da. Gozoa aipatu dugun parte hartzeagatik, inolako arazorik ez delako egon eta inolako lesiorik ere ez delako gertatu. Gainera, txapelketa abiatu zenetik 14 urte igaro ondoren, lehenengo aldiz Debagoieneko taldeak irabazi du seniorren arteko triangularra, Real Sociedad eta Eibar taldeei gailenduz, eta hori ere oso positiboa da.
Gazia ere izan dela aipatu duzu. Alderdi negatiboan zerbait nabarmendu nahi duzu?
Hamalau urte hauetan lehenengo aldia izan da lehiaketa Mojategin jokatu dela, Arrasateko kirol gunean, eta agian horrexegatik, aurreko urteetan baino publiko gutxixeago gerturatu da partiduak ikustera. Hori bai, etorri direnak ederto pasatu dute eta espero dugu etorkizunean txapelketak jende gehiago erakartzea.
Taldeen parte hartzeari dagokionez, sekulako arrakasta izan duzue aurten ere.
Bai, eta oso eskertuta gaude urtero-urtero gerturatzen diren taldeei. Aurten, guztira, 450 neska izan ditugu eta sekulako marka da. Pertsona kopuruari dagokionez, esan daiteke, erreferentziazko txapelketa bilakatu garela Euskal Herrian. Badira beste batzuk, Gasteiz Cup eta besteren bat, baina inork ez du guk dugun jarraikortasuna lortu. Urtero antolatzea, hamalau urtez jarraian, oso pozgarria da, eta baita lan handia ere.
Txapelketa abiatu zenetik 14 urte igaro ondoren, lehenengo aldiz Debagoieneko taldeak irabazi du seniorren arteko triangularra
Etorkizuneko helburuak zeintzuk dira?
Gustatuko litzaiguke Gabonetako Txapelketatik 'emakumezkoaren' erreferentzia desagerraraztea eta naturaltasunez, soilik, Gabonetako futbol txapelketaz hitz egitea. Hori da erronka nagusia. Naturaltasunez aipatu behar ez izatea emakumezkoa denik, gizonezkoa dela aipatzen ez den bezalaxe. Horrek aurrerapen handia suposatuko luke. Eta kirol honen sustapenean aurrera pausu handia ekarriko luke.
Debagoieneko futbol taldea, garaikurrarekin.
Bukatzeko, zein garrantzi dauka zuretzat Debagoieneko taldearen garaipenak? Esan daiteke bertako futbol taldeek lan handia egin dutela azken urteotan, ezta?
Zalantzarik gabe, pozgarria da. Debagoieneko taldeek emakumezkoen futbolaren sustapenean lan handia egin dute eta herriz herri lanean jarraitzen dute. Hamalau edizioren ondoren, ez Realak, ez Athletic-ek, ezta Eibarrek ere, aurten Debagoienak irabazi du eta hori sekulako lorpena da.