Ondoan Taldeak Kataluniako Urven Solutions konpainiako partaidetza nagusia eskuratu du

Egoitza Zamudion (Bizkaia) duen eta Instalazio, Mantentze, Energia eta Ingurumen Ingeniaritzan espezializatuta dagoen Ondoan enpresa-taldeak, Kataluniako Urven Solutions, S.L. enpresaren partaidetza nagusia eskuratu du bere matrizea den Ondoan Koop. Elk. sozietatearen bidez. Kataluniako konpainia aditua da energia berriztagarriak integratzeko elementuen diseinuan eta industrializazioan, batez ere eguzki-energia aparkalekuetarako markesinen bidez. Operazio hori Ondoan Taldea bere negozio-esparru historikoen barruan egiten ari den jardueren dibertsifikazioaren esparruan dago.

Akordioa martxoaren 21ean sinatu zen Castellar del Vallesen (Bartzelona) dagoen Kataluniako enpresaren egoitzan. Horrela, MONDRAGON Korporazioko Ingeniaritza eta Zerbitzuen Dibisioko kide den euskal kooperatiba-elkarteak Urven Solutions, S.L.ren partaidetza nagusia izango du, enpresa-proiektua Kataluniako Aquacenter taldearekin eta Bartzelonako konpainiaren bazkide sortzaileekin partekatuz.

Energia berriztagarrien sektorean adituak

Urven Solutions, S.L. energia berriztagarrien sektorean ibilbide luzea duten Antonio Morenok eta Josep Carrerasek sortutako enpresa da. Enpresak eguzki-panelen euskarrietarako soluzio modularren portafolio zabala du, eta bertan ibilgailu mota desberdinetarako markesina fotovoltaikoak nabarmentzen dira.

Hasiera-hasieratik, energia eta, zehazkiago, eraginkortasun energetikoa, Ondoan Taldearen jarduketen jarduera-eremu nagusietakoa izan da, eta, horren ondorioz, 2016an beste sozietate-partaidetza bat gauzatu zen, orduan, Auditoretza eta Zerbitzu Energetikoetan jarduten duen eta une horretatik aurrera Ondoan Taldean sartu zen Orgaus Systems S.L. sozietatean.

Orain, Ondoanek beste urrats bat eman du eta merkatuko nitxo berri honetan partaidetza hartu du. Merkatuko nitxo horrek hazkunderako aurreikuspen eta garapenerako potentzial handiak ditu, aparkalekuetan eta estalkietatik haragoko beste azalera-mota batzuetan energia berriztagarriak instalatzea ahalbidetzen duten soluzioen bidez. Horrela, deskarbonizazio-prozesua bultzatzea eta etorkizunean arlo horretan egongo diren lege-eskakizunei aurrea hartzea errazten du. Testuinguru horretan, Ondoan guztiz industrializatuta dauden eta osagai estetiko handia duten soluzio integralen aldeko apustua egiten ari da, bezeroei aholkularitza teknikoa emateko gaitasun handia duen giza taldearen aldeko apustuaz gain.

Ondoanek beste urrats bat eman du eta merkatuko nitxo berri honetan partaidetza hartu du. Merkatuko nitxo horrek hazkunderako aurreikuspen eta garapenerako potentzial handiak ditu.

Horrela, Ondoanek, jasangarriak diren eta ingurunea errespetatzen duten, pertsonei garapenerako aukera berriak emango dizkieten eta sarrera-iturri berriak ekarriko dituzten etorkizuneko negozio berrietan hazten jarraitu nahi du. Beti ere Taldearen betidaniko jarduera tradizionalekin, hau da, instalazioen ingeniaritzarekin eta horien mantentze-lanarekin, ingurumenarekin, energiarekin, barne-giroaren kalitatearekin edo laneko arriskuen prebentzioarekin erlazionatutako negozioak.

MONDRAGON Enpresa Sustapena

Inbertsio-eragiketa berri hau ekintzailetza-gaitasunak aktibatzeko eta kooperatiben artean negozio berriak sustatzeko estrategia korporatiboaren testuinguruan kokatzen da, hazteko gaitasuna duten enpresa gazteen aldeko apustuarekin. MONDRAGONek bost urte daramatza eratu berri diren hogei bat enpresatan inbertitzen, kooperatibak enpresa horien kapitalean inplikatuz eta, beharrezkotzat jotzen denean, arrisku-kapitaleko Funts Korporatiboekin lagunduz, arriskuak hasierako faseetan hartzea konpentsatzeko