Nola aukeratu eguzkitako kremarik onena zure larruazalerako uda honetan

Zein babes-faktore aukeratu behar dut? edo, zenbatean behin aplikatu behar dut krema?, horiek dira sortzen zaizkigun ohiko zalantzetako batzuk. Baina garrantzitsua da kontuan hartzea eguzki-erradiazioak edozein garaitan eragiten digula, eta, beraz, urteko 12 hilabeteetan larruazala babestu behar dugula.

Gure hezurrentzat onuragarria den D bitamina ematen digun osasun- eta energia-iturria da eguzkia. Baina eguzki izpien pean jarriko bagara, ahalik eta neurri gehien hartu behar ditugu. Azala da gure gorputzak duen lehen oztopoa, eta kanpoko erasoetatik babesten gaitu. Eguzki-izpien kasuan, larruazalaren zahartze goiztiarra, erredurak edo azaleko minbizia dira arrisku zuzenak.

Zure larruazalerako eguzkitako kremarik onena aukeratuta eta aholku hauek kontuan hartuta, azal distiratsu eta babestua izango duzu uda honetan!

Zer dira UVA eta UVB izpiak?

Eguzki-izpiak, izpi ultramoreak (UV) izenez ere ezagutzen direnak, ikusezinak dira giza begiarentzat, eta uhin-luzeraren arabera sailkatzen dira.

Uhina zenbat eta laburragoa izan, orduan eta biziagoa da eguzki-izpien energia.

Hiru erradiazio mota daude:

• UVC: uhin honen luzera laburrena da. Ozono-geruzak izpi horiek xurgatzen ditu lurrera iritsi aurretik.
• UVB: uhin ertaineko izpiak dira, ozono geruzaren bidez hein handi batean xurgatzen badira ere, lurrazalera iristen direnak. Eguzki-erreduren (larruazaleko inflamazioa) eta eritemen (azala gorritzea) eragileak dira.
• UVA: uhin honen luzera luzeena da eta izpi horietako gehienak lurrazalera iristen dira. Zahartze goiztiarraren eta azaleko minbiziaren eragileak dira.

Zer da FPS Eguzki-Babeserako Faktorea?

Lehenik eta behin, argitu behar da eguzki-babeserako krema erabiliz eguzkiaren eraginpean egon gaitezkeen denbora adierazten duen indize bat dela FPS (Eguzki-Babeserako Faktorea).  PSFak eritema sortzen duen erradiazioari (UVB) bakarrik egiten dio erreferentzia, baina eguzki-kremek UVB eta UVA erradiazioen aurkako babesa eskaini behar dute.

Kremaren testurak eta formatuak ez diote babesari eragiten, baldin eta gure larruazalerako babes-faktore egokia erabiltzen ari bagara eta behar bezala aplikatzen ari bagara.

Hauxe da eguzki-babesen sailkapena:

Eguzkitik babesteko zer faktore erabili behar dut?

Azal guztiek ez dute berdin erreakzionatzen eguzki-esposizioaren aurrean; beraz, gure larruazalaren mota hartu behar da erreferentziatzat, fototipoa deritzona. Giza larruazalaren tonu desberdinak sei taldetan sailkatuta daude, eguzki-erradiazioa asimilatzeko duten gaitasunaren arabera. Horietako bakoitzak ezaugarri ezberdinak ditu eta erreakzio ezberdinak izaten ditu eguzkia hartzen duenean.

Beharrezkoa da larruazala babestea gure fototiporako egokia den babes-faktore bat erabiliz.

Fototipoaz gain, garrantzitsua da beste faktore batzuk ere kontuan hartzea FPS aukeratzean:

• Zenbat denbora egongo zaren eguzkitan.
• Eguneko zer ordu aukeratzen dituzun. UVB izpiak biziagoak dira 10:00etatik 16:00etara artean.
• Non jartzen zara eguzkitan, erradiazioa ere altitudearen araberakoa baita, kilometroko % 10 handituz. Eta ez ahaztu harearen edo elurraren islaren erradiazioa.
• Urteko sasoia. Eguzki-erradiazioa indartsuagoa da udako hilabeteetan, baina udazkenean eta neguan babesa zaindu behar da, batez ere hainbeste estaltzen ez ditugun lekuetan, aurpegia, lepoa eta eskuak, adibidez.

Eguzki-babeslea aplikatzeari buruzko ohiko zalantzak:

Noiz aplikatu behar da eguzki-babeslea?

Produktua eguzkitan egon baino gutxienez 30 minutu lehenago aplikatu behar da. 

Nola aplikatu behar da produktua?

Zabaldu produktua uniformeki. Ez ahaztu betazalak, eskuak, ezpainak, oinak, izterrak, belarriak…

Zenbat eguzki-krema erabili behar da?

Heldu batentzako gomendatutako kantitatea 36 gramokoa da, edo 6 kafe-koilaratxoren baliokidea.

Zenbatean behin bota behar da krema?

Lehenengo aplikazioaren ondoren, 2 orduz behin errepikatu behar da, eta bainatu edo jarduera fisikoak egin ondoren.

Zenbat denbora egon daiteke eguzkitan?

Eguzki-babesa erabili arren, gomendio orokorra eguzkitan luzaroan ez egotea da. Haurrak eta haurtxoak zuzeneko eguzki-izpietatik babestu behar dira eta txanoa eta kamiseta eraman behar dituzte jantzita.

Zer beste neurri hartu behar dira?

Babestu begiak kristal polarizatudun eguzkitako betaurrekoak erabiliz, eta edan ura deshidratazioa saihesteko. Eguzkitan egon ondoren, ondo hidratatu azala aftersuna erabiliz.

Edukia hemendik jasota: https://www.eroski.es/eu/inspirate/blog-eroski/nola-aukeratu-eguzkitako-kremarik-onena-zure-larruazalerako-uda-honetan/