"Negozio berriekin dibertsifikatu nahi dugu, bai automozio arloan eta baita automoziotik kanpo ere"

Zerk motibatu zaitu gehien Errekara etortzeko?

Hasieran Errekako zuzendariarekin izan nituen elkarrizketetan transmititu zidan eta sumatu ahal izan nuen eraldaketarako gogo handia dagoela. Automozioa eraldatzen ari den sektorea da, erakunde eta instituzioetatik apustu bezala egiten ari dena mugikortasun berriaren bueltan. Europa eta Espainiarentzat sektore estrategiko bat da eta Erreka gogo handiarekin dago eraldaketa bat egin eta sektore berrietan sartzeko. Horretaz gain, plastiko teknologiarekin hezi naiz profesionalki eta aukera hau ere plastikoarekin lotutakoa da. Bi faktore horiek motibatu naute, batez ere.

Zer eskainiko diozu Errekari? Zer nabarmenduko zenuke?

Alde batetik, talde-lana eta konfiantza. Herrialde ezberdinetako lantegiekin ari gara lanean  eta talde-lana eta konfiantza beharrezko dela uste dut laneko giro on bat sortu eta talde ona egiteko.

Bestetik, emaitzarekiko eta prozesuarekiko disziplina eta ardura sentimendua indartzea nahiko nuke. 

Zeintzuk dira orain dituzun erronkak Errekan?

Erronkak herrialdeen arabera sailkatu beharko genituzke. Bai Txekian eta bai Mexikon hazkunde handia jasan dugu eta taldeak tamaina berrirako sendotu behar dira. Hazkundearekin jarraitu behar dugu, baina hazkunde kontrolatu batekin. Aurreikuspen onak ditugu datozen urteetan ere hazten jarraitzeko, baina beti ere lehenengo egokitu behar ditugu prozesuak eta ekipoak tamaina berrira. Lan bat dago hor.

Bestetik, negozio berriekin dibertsifikatu nahi dugu, bai automozio arloan eta baita automoziotik kanpo ere. Hori aplikatuko nioke bai Txekiari eta baita Mexikori ere.

Antzuolako egoitzan Contract Manufacturing-en erreferente izateko lanean ari gara; proiektu berriak erakarri eta aurrerapauso handiak egin ditugu azken aldian. Antzuolatik ere sostengu handia ematen diegu kanpoko ekoizpen-lantegiei. Gure helburua da, know-how-a Antzuolan izan arren, ekoizpen-lantegiek independentzia puntu bat lortzea.

Azkenik, Txinan dugun lantegiari dagokionez, jarduera komertzial sakona egiten ari gara eta bezeroak erakarri eta lantegia martxa onean jartzea izango da epe motzeko helburua. Merkatuan, konpetentziarekiko abantailak baditugu, han erremintak garatu ditzakegulako txineraz hitz eginez, bezero txinatarrekin. Han garatu ditzakegu Txinan ekoizteko edo han garatu eta beste lantegietan ekoiztu, Txekian, Mexikon edo Antzuolan. Beste lantegietarako atea izan nahi du Txinakoak.

Txinako merkatuak indar handia du gaur egun eta datozen urteetan ere hala izango du; han presente egotea ezinbestekoa dela iruditzen zaigu bai merkatuan eta bai konpetentziaren aurrean egoera eroso batean sentitzeko.

Contract manufacturing arloan zein aukera ikusten dituzu Errekan?

Erreka Plastics-en barne Medical sektorean sartzen ari gara eta gaur egun esan dezaket Contract Manufacturing hornitzailea garela. Zergatik? Diseinu fasean sartzen gara bezeroarekin eta bukaerara arte berarekin gaude, produktua eman arte. Balio kate guztia barne hartzen dugu. Automozio mailan ere aukerak daude mugikortasun elektrikoko hainbat produktu eta garapen berriekin. Aurrerapen handiak egiten ari gara gure ingeniaritzako sailarekin eta aukera handiak ditugu Contract Manufacturing arloan hazteko.

Zer nabarmenduko zenuke Errekatik?

Erreka bat gara eta familia bat izan behar dugu. Merkatuan hainbat baldintza aldaketa egoten dira eta dibertsifikatuta egotea oso garrantzitsua da Errekako negozio ezberdinentzat, onura bat baita denentzat; Erreka marka indartsuago egiten du eta enpresaren zimentuak sendotzen ditu.

Bestetik, hemen daramadan denbora gutxian ikusi dut jende oso baliagarria dagoela Errekan, esperientzia handiarekin, urte asko eman dituena enpresan eta hori indargune bat da. Ez da ikusten enpresa guztietan eta abantaila bat da konpetentziarekiko. Horrek erakusten du gauzak ondo egin direla iraganean eta espero dut etorkizunean berdin edo hobeto jarraitzea.

Kooperatiba izaerak zein abantaila ematen dio Errekari?

Ikusten dudan abantaila da denek jabetza sentimendua dutela eta asko kooperatibista izanda enpresaren emaitzak eta erantzukizunak haienak direla sentitzen dutela. Hori ezberdintasun handia da kooperatiba ez den enpresa batekiko. Normalean erronka bat izaten da jendeari emaitza orokorrarekiko erantzukizuna eskatzea, norberaren erantzukizunera mugatzen baitira. Kooperatiban ikusten dudana da talde-lan handiagoa dagoela eta kooperatibaren parte sentitzeak eragiten du ondokoari laguntzea, informatzea eta jakinmina sustatzea.