MSI Taldeak urteko ETE industrial onenaren saria jaso du

Gipuzkoako Ganberak egin dio aitortza, “sistema eta prozesu industrialen ingeniaritzan egindako ibilbide nabarmenagatik”.
Card image cap
Pello Rodriguez, MONDRAGONeko presidentea, ezkerretik lehena, eta Marijo Pagalday, MONDRAGONeko presidenteorde eta MISE Dibisioko zuzendari nagusia, ezkerretik eskuinera bosgarrena, MSI Taldeko zuzendari nagusi, presidente eta gainerako kideekin izan dira Donostiako ekitaldian.
2025/04/04

Urtero nabarmentzen ditu Gipuzkoako Ganberak lurraldeko enpresarik esanguratsuenak, eta aurten ere egon da MONDRAGONen ordezkari bat sarituen artean: MSI Taldea, enpresa txiki eta ertain (ETE) industrialaren sailean. Ekitaldian Gipuzkoako gizarte eta ekonomia munduko 400 ordezkari baino gehiago egon dira.

MSI Taldearen proiektuari aitortza egin dio Ganberak, Andoain eta Aretxabaletako egoitzetan, zein Mexiko eta Txileko filialetan ere, I+G+Bren aldeko apustu sendoa egiten baitu, bere diru sarreren %10 ikerketa eta garapenera bideratuz. Baita sektore estrategikoetan teknologia aurreratuak bultzatuz ere, hala nola siderometalurgian, beiran, paperean eta uren tratamenduan. Manufacturing Analytics plataformak eta IoT eta MES soluzioek industria ugariren eraginkortasuna eta jasangarritasuna optimizatu dute, eraldaketa digitalean lider gisa duen posizioa indartuz.

I+G+Bren aldeko apustu sendoa egiten du MSI Taldeak, bere diru sarreren %10 ikerketa eta garapenera bideratuz

Iban Luis MSIren zuzendariak nabarmendu duenez, “datuei balioa eman eta haien tratamenduari gure negozioan lehentasuna emateko erabaki estrategikoa hartuta iritsi dira gaur egun direna izatera. Lehengo ingeniari perfilez gain, orain matematikari eta fisikariekin er eegin dugu lan”.

MSI - Gipuzkoako Ganbera saria03.jpg

Esteban Irisarrik, kooperatibaren presidenteak, jaso zuen Luisekin batera saria, eta MSI Taldearen misioa kontatu zuen: “Eman diguten mundua hobeto uztea da gure helburua. Ingurumenari asko begiratzen diogu, uraren edo airearen kalitatea hobetzeko teknologietan sakonduz. Eta ez dugu ahaztu nahi gure alderdi soziala, elkarrekin aritu nahi dugu, MONDRAGONeko kooperatibok egin ohi dugun bezala, denontzako onak diren proiektuak garatzen”.

Urtean 12 milioi euroko fakturazioarekin eta kualifikazio handiko 100 profesional baino gehiagoko lantaldearekin, MSI Taldeak hazten jarraitzen du

Urtean 12 milioi euroko fakturazioarekin eta kualifikazio handiko 100 profesional baino gehiagoko lantaldearekin, MSI Taldeak hazten jarraitzen du, berrikuntzan, aliantza estrategikoetan eta nazioarteko hedapenean oinarritutako estrategia batekin. Aitorpen honek balioa sortzeko, sektorearen lehiakortasuna bultzatzeko eta industria bikaintasunarekin duen konpromisoa berresteko duen gaitasuna azpimarratzen du, eta baita kalitatezko enpleguaren eta euren ingurunean eragin positiboa izateko apustua nabarmendu ere.

Aurtengo beste saridunak

  • Salto Systems, GIPUZKOAKO ENPRESA saria
  • Lander, NAZIOARTEKOTZE saria
  • El Diario Vasco, ZERBITZU ENPRESA saria
  • NX Technologies, BERRIKUNTZA Enpresa saria 

Ekitaldia Mauricio Arregui Gipuzkoako Ganberako presidentearen hitzekin amaitu da, eta saritutako enpresak zoriondu ditu, eta “aberastasuna eta enplegua sortzeagatik ez ezik, aurrerapen soziala bultzatzeagatik eta lanean, ahaleginean, lankidetzan eta etorkizuneko ikuspegian oinarritutako enpresa nortasuna indartzeagatik” duten konpromisoa nabarmendu du.

Automatika, informatika industriala eta telekomunikazioak