MONDRAGON, konpromisoaren indar eraldatzailea

Kolektiboarena da indarra, eta testimonio hauekin azpimarratu nahi du hori MONDRAGONek.

Marta Carazo (Eroskiren Berdintasun Behatokiko arduraduna)

“Ez gara enpresa berdinzaleagoa izango horretarako ahalegin kontzientea egiten ez badugu”

Zer transmititzen dizu zuri martxoaren 8ko egun honek?
Mundu osoko emakumeak batzeko eguna da, haien jatorria, arraza, lanbidea eta aberastasun maila kontuan hartu gabe. Ospakizun-eguna da, baita borroka-eguna ere. Feminismoaren botere eraldatzaileari esker, aurrerapenak lortu dira berdintasunaren arloan, baina, ez gaitezen engaina, oraindik asko dago egiteko, eta beste 8M bat gehiago beharrezkoa da emakumeek gizarteko eremu guztietan parte hartzea eta desberdintasunen amaiera aldarrikatzea.

Kooperatiban duzun roletik edo posiziotik abiatuta (zaila izango da bizitzatik oro har bereiztea), berdintasunaren alde zer aldaketa egin ditzakezu?

Kooperatibistok gizarte berdinzaleago eta, azken batean, bidezkoago eta kalitate demokratiko handiagoko baterantz aurrera egiteko asmoa dugu. Hala ere, ez gara enpresa berdinzaleagoa izango horretarako ahalegin kontzientea egiten ez badugu. Badakigu aldaketa sozialak motelak direla, baina lanean jarraitzeko erabakia hartu dugu, etorkizunean naturaltasunetik berdintasunez joka dadin.

Gizarte-kontzientzia aktibatzeko erronkan, lanean jarraitu behar dugula uste dut. Aldaketaren eragilea desberdintasunaren existentziaz jabetzea eta berdintasuna balio ukaezin gisa sinestea da.
Horretarako, nire ustez, funtsezkoa da gizartea prestatzea eta sentsibilizatzea, genero-desberdintasuna murrizten laguntzen duten estereotipoak, praktikak eta portaerak modu kontzientean identifikatu eta zuzendu ahal izateko.

Baina hori guztia osatzeko, arlo horretan aurrera egiten lagunduko diguten ekintza zehatz, iraunkor eta sendoak ezarri behar dira. Egungo funtzionamendua hautsi eta berdintasun osoa eta kontzientea lortzeko baldintzak sortzen dituzten ekintzak.

Emakumeek erantzukizun profesional handiagoko lanpostuetan, enpresa-gobernuko organoetan eta posizio auto-gestionatuagoetan presentzia handiagoa izan dezaten lortzeko ekintzak behar dira, beren etorkizunaren eta dagokien enpresaren jabetzaren jabe senti daitezen.

Hainbat neurri, hala nola genero-kuotak ezartzea, berdintasunezko hautaketa- eta sustapen-prozesuak, sexuaren arabera bereizitako adierazleen etengabeko jarraipena, jazarpena prebenitzeko protokolo eraginkorrak, hizkuntza inklusiboaren erabilera, kontziliazio-politikak, ikuspegi inklusiboa duten enpresa-helburuen eraikuntzan parte-hartze aktiboa, etab.

Alaitz Elorza Mondragon (Fagor Automationeko lan-bazkidea) 

“Zuzendaritza organoetan egonda, emakumeek erakundea hobetzen dute”

Zer transmititzen dizu zuri Martxoaren 8ko egun honek?
Martxoaren 8a ospatu beharrak erakusten du lan eta bizi nahi dudan mundua momentuz existitzen ez dela. Emakume langileok elkartu eta generotik harago, pertsona moduan tratatuak izango garen munduaren bila jarraitu behar dugu, aukera berdintasunean eta erronka parekatuekin. Lanean, familian, kalean... inposatutako rolik gabe, aske bizitzeko eta garatzeko pertsona gisa, emakumeen begiradatik.

Zure roletik, kooperatiban (edo bizitza pertsonalean), zertan eragingo duzu berdintasunaren alde?
Fagor Automationen lehen Berdintasun Batzordeko kide izan nintzen, eta eredu kooperatiboan berdintasuna gure oinarrietako bat den arren, generoen arteko parekotasunaren alde lan egin beharra daukagula argi dago. Badaukat itxaropena hurrengo belaunaldiek, arlo teknologikotik eta zientzietatik joko dutela, emakumeak hor egongo garela argi daukat. Era berean, argi daukat zuzendaritza zein organo sozialetan emakume gehiagoren presentzia izango dugula. Horrek erakundea bera hobetuko du, zalantzarik gabe.

Nerea Aranguren (Danobatgroup-eko zuzendari nagusia eta MONDRAGONeko presidenteordea)

“Ematen dugun urrats bakoitza, txikia badirudi ere, etorkizun bidezkoago bati gehitzeko oroigarria da”

Zuri, pertsonalki, zer transmititzen dizu M8ak?
Martxoaren 8a gogoetarako eguna da niretzat, baina baita aitortzarako eguna ere. Atzera begiratzeko unea da. Gizarte gisa eta kooperatibetan bereziki, gin dugun guztia baloratzeko unea da, baina baita oraindik falta denaz jabetzekoa ere. Ematen dugun urrats bakoitza, txikia badirudi ere, etorkizun bidezkoago bati gehitzeko oroigarria da.

Enpresan (edo bizitza pertsonalean) duzun roletik, zer egin dezakezu berdintasunaren alde?
Enpresan dudan roletik abiatuta, hasitako bidetik jarraituko dut, bai eta kooperatibak beren berdintasun-planen bidez egiten ari diren guztiari babesa erakutsiz. Egia da M8a mugarri garrantzitsua dela, berdintasuna agerian uzteko beharrezkoa den oroigarria, baina ezin gara horretan bakarrik geratu. Benetako eraldaketa ez da egun bakar batean gertatzen, baizik eta etengabeko lanean, eguneroko erabakietan eta pertsonen eta erakundeen benetako konpromisoan.

Amaia Rementeria (Eikako lan-bazkidea)

“Kontzientziazio lana falta da gune eta momentu batzuetan”

Zer transmititzen dizu zuri Martxoaren 8ko egun honek?

Urte askotako borrokarekin jarraitu behar dugula uste dut. Arlo batzuetan hobekuntzak egon dira baina asko dago egiteko oraindik.

Zure roletik, kooperatiban (edo bizitza pertsonalean), zertan eragingo duzu berdintasunaren alde?

Transmisioa garrantzitsua dela uste dut, baita parte-hartzea ere. Kontzientziazio lana falta da gune eta momentu batzuetan, Eikan zein kalean, bakoitzak bere buruari eta bere poltsikoari begiratzen dio, eta elkarrekin indartsuagoak gara. Nik ahal dudan neurrian parte hartuko dut M8ko aldarrikapenetan. 

Ana Jesus Uriguen (Eikako lan-bazkidea)

“Ez da ospakizun eguna, aldarrikatzeko eguna baizik”

Zer transmititzen dizu zuri Martxoaren 8ko egun honek?.

Niretzat egun berezia da. Emakumeen eskubideen alde egiten diren ekintzetan parte hartzeko eguna. Ez da ospakizun eguna, aldarrikatzeko eguna baizik. Oraindik lan asko dago egiteko.

Zure roletik, kooperatiban (edo bizitza pertsonalean), zertan eragingo duzu berdintasunaren alde?

Gure herrian antolatutako ekintzetan parte-hartuko dut, hori izango da nire ekarpena.

Digna González (Bexen Cardio-ko zuzendaria)

“Kooperatiba bateko gerentzia betetzeak aukera eta erantzukizun handia ematen dit berdintasunaren alde lan egiteko”

Zer transmititzen dizu zuri Martxoaren 8ko egun honek?

Martxoaren 8a gogoeta, aitortza eta konpromiso eguna da. Emakumeok enpresetan eta gizartean egiten dugun ekarpena aitortzeko aukera bat da, baina, aldi berean, oraindik ere berdintasun osoa lortzeko dugun erronkaz jabetzeko eguna. Kooperatiben munduan, emakumeen lidergoa gero eta nabarmenagoa izatea urrats handia da, eta bide horretan aurrera egiten jarraitzeko dugun beharra eta konpromisoa azpimarratzen du.

Zure roletik, kooperatiban (edo bizitza pertsonalean), zertan eragingo duzu berdintasunaren alde?

Zientzia eta teknologia mundutik nator, eta beti eskertu izan dut emakume erreferenteak izatea, izan ere, horrek nire ibilbidean lagundu dit. Orain arte, emakumeak ZTIM (Zientzia, Teknologia, Ingeniaritza eta Matematika) arloan ikusgai bihurtzeko ahalegina egin dut, eta orain, zuzendaritza-postu bat betez, aukera dut emakumeak erantzukizuneko karguetan ere ikusarazteko.

Bestalde, kooperatiba bateko gerentzia betetzeak aukera eta erantzukizun handia ematen dit berdintasunaren alde lan egiteko, eta lankidetza eta berrikuntza sustatzen dituen ingurune bat eraikitzen jarraitzeko.