Ikerlanek adimen artifizialeko Autotrust proiektuan parte hartzen du

Ikerlan AutoTrust proiektuaren partzuergoan giltzarri den zortzi bazkideetako bat da, adimen artifizialean (IA) oinarritutako funtzionalitate fidagarriak garatzeko ekimen berritzailea, mugikortasun kooperatiboaren, konektatuaren eta automatizatuaren (CCAM) eremu konplexurako.

Eusko Jaurlaritzak 2023ko ELKARTEK deialdiaren bidez babestutako proiektu honek Autoev@l eta AutoLib proiektu arrakastatsuen jarraipena adierazten du. Ikerlanekin lankidetzan eta Vicomtech-en koordinaziopean, CEIT, Euskal Herriko Unibertsitatea (EHU), Automotive Intelligence Center (AIC), Basque Center for Applied Mathematics (BCAM), Tecnalia eta Mondragon Unibertsitateak osatutako partzuergoak teknologia disruptiboak eskaintzen dizkie mugikortasunaren, trenbideko garraioaren, automobilgintzaren eta industriaren sektoreko enpresei.

Ikerlanen ekarpen nagusia da adimen artifizialean oinarritutako teknologien erabilera egokitzea, sektore kritikoetan ezartzeko. Sektore horietan, fidagarritasuna ezinbestekoa da giza bizitzak babesteko, hala nola automobilgintza, robotika edo trengintza.

Zentro teknologikoak adimen artifizialarekin segurtasun-funtzioak garatzeko bizi-ziklo bat definitzeko lan egingo du, eta hura modu seguruan integratzeko mekanismoak ezarriko ditu, bai eta sistema horiek ingurune birtualen bidez egiaztatzeko eta baliozkotzeko aukera emango duten automatizazio-estandarrak eta -mekanismoak definitzeko ere. Aurrerapenak industria-erakusle kritikoetan ebaluatuko dira, hala nola sistema robotikoetan edo trenbide-aplikazioetan.

"AutoTrust-en, Ikerlan arduratzen da adimen artifizialak modu seguruan funtziona dezan etorkizuneko mugikortasun konektatu eta automatizatuaren sektorean. Horretarako, sistema autonomoak garatzeko funtsezko erronkak aztertzen ari gara, fidagarritasunari eta gardentasunari lehentasuna ematen dioten Europako estrategiei jarraituz", azaldu dute Irune Agirrek, Metodologia Fidagarri eta Zibersegurako taldearen arduradunak, eta Peio Onaindiak, proiektuaren arduradunak. "Hainbat erronkari egin behar diegu aurre, hala nola ziurtapen-erakundeei adimen artifizialaren azalgarritasuna bermatzea, egungo araudiek hori aurreikusten ez dutenean, eta hainbat egoeratan jokabide autonomoa baliozkotzea".

Ikerlan erronka horiei erantzuten ari zaie, AutoTrusten ikerketa SAFEXPLAIN bezalako ekimenekin lerrokatuz Europan, eta segurtasunean eta birtualizazioan duen esperientzia handiari esker. Gainera, duela gutxi, zentroak aurrerapauso bat eman du adimen artifizialak osatzen duten sistemak ziurtatzeko, eta TÜV Rheinland erakunde ziurtatzailearekin ebaluatu du zentroaren bizi-zikloaren egokitzapena, sistema seguruak garatzeko.

Ikerlanek Autotrust-en eta SAFEXPLAINen egindako aurrerapenak aurkeztu ditu HIPEACeko aditu-talde garrantzitsu baten aurrean. Foro horretan, industriako ikertzaile, akademiko eta profesionalek beren ezagutza eta aurkikuntza berrienak partekatzen dituzte.