Fagor Taldeak 2022an baino %63 gehiago irabazi du 2023an

“Fagor berrikuntzaren eta iraunkortasunaren alde ari da. Horren isla da haren ibilbidea. Gaur-gaurkoz, hiru berrikuntza zentro daude Taldean, eta, horiez gaindi, proiektu askotan ari da parte hartzen, bezeroei eta gizarteari puntako soluzioak eskaintzeko ahalegin etengabean. Horrek ere badu zerikusia urteko emaitzetan”, azaldu du Joxean Alustiza Usandizaga Fagor Taldeko lehendakariak. Horri loturik, Fagorreko kooperatibek fabrika adimendunei, makina eta lantegien efizientziari, ekoizpen bitartekoen moldagarritasunari, karbono aztarnari edota ekonomia zirkularrari loturik abiarazirik dituzten proiektuak azpimarratu ditu.

2023ko abenduan, 5.124 lanpostu zituen Euskal Herrian -aurreko urtean baino 237 gehiago-, eta horien %89 zen bazkide

Ostera, pertsonen alorreko zenbait datu ere eman ditu ezagutzera Fagorrek Batzar Nagusian. 2023ko abenduan, 5.124 lanpostu zituen Euskal Herrian -aurreko urtean baino 237 gehiago-, eta horien %89 zen bazkide. Era berean, bazkide kopuruak gora egin zuen Fagorreko kooperatibetan: 550 bazkide berri egin ziren. Datu esanguratsu horiek eta bestelakoek, erronka berriak dakarzkio Euskal Herriko talde kooperatibo industrial handiena denari. “Fagorreko negozioak aldatuz doaz, gizartea bezala. Horrek, gobernantza modua eguneratu beharra dakar, batez ere, indartsu jarrai dezan eredu kooperatiboak. Heziketa kooperatiboan sakontzeko urratsak ere egin dira azken urtean, eta urrats sendoagoak egingo dira aurrerantzean”, aitortu du Fagor Taldeko lehendakariak.

Garapen profesionalerako aukera

Fagorrentzat esangura handiko erronka da egungo eta etorkizuneko langileen heziketa eta garapen profesionala bermatzea. Eta horixe ere izan du berbagai Batzar Nagusian: “Gizabidea Fundazioaren bidez, hezkuntza proiektu inportanteak bultzatu ohi ditu Fagorrek urtez urte, izan Mondragon Unibertsitatekoak, Debagoieneko (Gipuzkoa) zenbait ikastoletakoak... Finean, gizarte eta komunitate baten ongizatea hertsiki dago loturik heziketarekin eta horrek zabal ditzakeen aukerekin. Horretarako bitartekoak eskaintzeko ari da lanean Fagor, hezkuntzatik bizitza profesionaleraino”. Bestalde, ZTIM alorrak zeregin horretan duen garrantzia azpimarratu du Fagorreko lehendakariak. “Gaurko eta etorkizuneko erronkak ezagututa, ezin daiteke uka ZTIM alorraren garrantzia. Kooperatiben berrikuntzarako bokazioak ere beharrezko ditu halako profilak. Horregatik ari da Fagor indar bereziz alorra indartzea bilatzen duten proiektuetan murgildurik”, azpimarratu du. 2023an, besteak beste, Lanhezi, First Lego League eta Mondragon Ztim Hub proiektuetan esku hartu du Fagorrek.

Planetaren zaintza

Fagor Taldeak arreta berezia du jarria haren kooperatibek ingurumenean duten inpaktua murrizteko neurri eta ekinbideetan. Eta nabari da horren eragina. Gaur-gaurkoz, Fagorrek mundu mailan duen energia kontsumoaren %63 da berriztagarria -iaz baino %14 gehiago-, eta %44 murriztu du energia kontsumo ez berriztagarria. Era berean, 2022ko datuekin alderatuta, %52 murriztu da haren CO2 isuria lehenengo eta bigarren irismenetan. Bestalde, Fagorrek urrats esanguratsuak egin ditu ekonomia zirkularrean, besteak beste, hondakinen aprobetxamendurako proiektu desberdinak abiatuta. Horri esker, 2023an erabilitako lehengaien %75 izan zen jatorri birziklatukoa.

Lurraldearekin konprometiturik

Ohi duen moduan, kooperatiba taldeak komunitatearen aldeko lanean jarri du azpimarra Batzar Nagusian. Besteren artean, Debagoieneko enpresen eta hezkuntza zentroen topagune izango den Hirekin ekintzailetza eta berrikuntza gunearen ingurukoak azaldu ditu. Zehatz esanda, 2023an, 250.000 euroko ekarpena egin dio Fagor Taldeak proiektuari -2 milioi euroko laguntza emateko konpromisoa du haren egina-, eta espazioa kudeatzeaz arduratuko den Aholku Mahaiko kide bilakatu da. Bestetik, aurreko urteetako bidetik, lankidetza publiko komunitarioaren alde egin du, nagusiki, Debagoiena 2030 iraunkortasun sarearen bidez. Harekin, trantsizio ekosozialari loturiko hainbat ekimen bultzatu ditu, hala nola, zenbait herrietan sortu diren komunitate energetikoak, tokiko elikadurari lotutako bailara mailako dinamika eta Tantai baso jabe kooperatiba. Era berean, 120.000 euroko laguntza bideratu du Fagor Herrigintza lankidetza programaren bidez, Biolurren, Gipuzkoako Kirol Egokituen Federazioaren eta Iñurriren proiektuak lagunduz.

Euskara Saria, lehenengoz

Aurten, Fagor Euskara saria antolatu du Fagorrek lehenengoz -Batzar Nagusia aprobetxatu du horretarako-. “Ezinbestekoa izan da, eta da, bertako langileek eta langile taldeek euskararen alde egiten duten lana eta duten konpromisoa. Aitortu beharreko zerbait da. Ideia horrekin sortu dira Fagor Euskara Sariak”, azaldu du Fagor Taldeko lehendakariak. Bada, bi saridun izan dira lehen urte honetan: Mondragon Assemblyko Finantza Departamentua eta Fagor Industrialeko Berrikuntza taldea. Fagor Taldeko presidenteak eman die saria.

Fagor Euskara Sariaren lehenengo edizioa Mondragon Assemblyko Finantza Departamentuarentzat eta Fagor Industrialeko Berrikuntza taldearentzat

Fagor Taldea

Fagor Taldea euskal kooperatiba talde industrial handiena da. 1964an eratu zen talde gisa, Ularco izenpean. Taldea osatzen duten zortzi kooperatibek soluzio teknologiko aurreratuak eskaintzen dituzte hainbat sektoretan: automozioan, makina-erremintan, ostalaritza eta sukaldaritzako ekipamenduan, etxetresnen osagaietan, eguzki energian eta jabetza industrialari loturiko zerbitzuetan. Arrasaten dauka egoitza nagusia eta Debagoiena (Gipuzkoa) eskualdekoak dira Taldea osatzen duten kooperatiba guztiak. Munduko hainbat tokitan ditu lantokiak, 11.565 langileko taldea osatuz. Hain zuzen ere, 15 herrialdetan banaturiko 30 lantegi industrial ditu nazioartean. MONDRAGON korporazioaren partaidea eta sortzaileetako bat da. Fagor Arrasate, Fagor Automation, Fagor Ederlan, Fagor Electrónica, Fagor Industrial, Copreci, Mondragon Assembly eta Galbaian kooperatibek osatzen dute Fagor Taldea.