Fabrikazio aurreratuaren kudeaketa jasangarrirantz doa Danobatgroup

Kooperatiba izaera duenez, hazkunde ekonomikoaren, ingurumen babesaren eta gizarte ongizatearen arteko oreka da Danobat makina-erremintan eta fabrikazio aurreratuan erreferente den industria taldeak orain dela 65 urte baino gehiago sortu zenetik bilatzen duen zerbait. Hala ere, azken urteetan, taldeko negozioek helburu hori areagotu dute modu bateratuan, jarduera jasangarritasunera eta ongizatera bideratuz, hurrengo belaunaldientzat etorkizun oparoagoa legatu gisa uzteko helburuarekin. Hori da aste honetan 2022ko ekitaldian jasangarritasunaren esparruan egindako ekintzen berri emanez argitaratu duen bigarren  jasangarritasun memoriatik ateratzen den ondorioa.

Azken urteetan, taldeko negozioek helburu hori areagotu dute modu bateratuan, jarduera jasangarritasunera eta ongizatera bideratuz, hurrengo belaunaldientzat etorkizun oparoagoa legatu gisa uzteko helburuarekin

NBEren Garapen Jasangarrirako Helburuekin (GJH) konpromisoa hartuta, industria taldeak modu transbertsalean txertatu du jasangarritasuna bere negozio ereduan. “Erabaki garrantzitsua -hala esan du Pello Rodriguezek, Danobatgroupeko zuzendari nagusiak- 2024tik aurrera taldeak izango duen etorkizunaren oinarriak ezartzen ditu-eta”.

Horretarako, Danobatgroupek 13 lan arlo eta hainbat helburu txertatu ditu bere kudeaketa ereduaren barruan, ASG irizpideetan oinarrituta (Ingurumenekoak, Sozialak eta Gobernu Onekoak), 2021-2024 Plan Estrategikoaren lehentasunezko ildo estrategikoen artean.

Planetarekin errespetutsuagoa den jarduera

Ingurumenaren kontserbazioan eta babesean eta klima aldaketaren aurkako borrokan arreta jarrita, Danobatgroupek milioi 1 euro inbertitu zituen 2022an Danobaten, Soralucen eta Idekon 2.500 eguzki plaka instalatzeko. Neurri hori aplikatzeak, energia garbi eta berriztagarriaren fluxu etengabea bermatzeaz gain, taldeko negozioek atmosferara egiten dituzten Berotegi Efektuko Gasen (BEG) emisioak murrizten ere lagunduko du, urtean 250 tona inguruko emisioa saihestuko baita. 

Gainera, gas eta energia elektrikoaren kontsumoa murrizteko ondo etorriko diren hainbat erreforma sartzen ari dira baliabideen erabilera jasangarriagoa sustatzeko, hala nola berokuntza eta argiztapen sistemen monitorizazioa eta kontrola edo argiaren araberako erregulazioa duen LED bidezko argiztapena, besteak beste.

Produktuen ingurumen inpaktua murrizteari dagokionez, Soralucek, Danobagroupeko kooperatiba eta fresaketa, mandrinatze eta funtzio anitzeko teknologian munduko liderra den fabrikatzaileak, Ekodiseinuan UNE-ISO 14006 ziurtagiria duten 3 makina modelo berri fabrikatu ditu 2022an, produktu horiek beren bizi ziklo osoan ingurumenean duten inpaktua minimizatzeko.

Era berean, aurreko ekitaldian, taldeak tresna bat diseinatu zuen Erakundeak bere negozioen jarduerarekin uzten duen Karbono Aztarna neurtzeko. Soluzio hori 2023tik aurrera ezarriko da Danobatgroupeko enpresa nagusietan, eta urte honetatik aurrera 1, 2 eta 3 irismeneko berotegi efektuko gasen emisioak ebaluatzeko eta kuantifikatzeko aukera emango du.

Ingurumen esparruan eta klima aldaketaren aurkako borrokan egiten duena egiten jarraitzeko, iaz, taldeak mugikortasun azterlan bat egin zuen, kooperatibetan lan egiten duten pertsonek lantokirantz egiten dituzten joan-etorriek ingurumenean duten inpaktua aztertzeko. “Bildutako datuak aztertzen ari dira, eta espero da 2023-2024an garraiobideak modu efizienteagoan erabiliz  joan-etorri horien eragin negatiboak murrizteko plan bat inplementatzea. Plan horren barruan sartuko dira joan-etorriak arrazionalizatzeko eta ibilgailu pribatuarekiko mendekotasuna desagerrarazteko neurriak.

Pertsonak erdigunean

Kalitatezko enplegua sortzea da Danobatgroupen 2021-2024 aldirako Plan Estrategikoan ezarritako helburuetako bat. 2022an plantilla hazi egin da,1423 pertsona izateraino, beraz, taldeak horren gainean zituen aurreikuspenak bete ditu. Asmoa ez da soilik kalitate handiko enplegu egonkorrak sortzea, erakundea osatzen duten pertsona guztien hazkunde pertsonal eta profesionalerako ingurune egokia sustatzea eta aniztasun, berdintasun eta diskriminaziorik ezaren printzipioak sustatzea ere sartzen dira asmo horren barruan.

Makina-erremintaren sektorea historikoki maskulinizatuta dagoen arren, taldeak irmoki sinesten du pertsona guztientzako aukera berdintasunean. Zentzu horretan, hainbat jarduera egin dira; hala nola, berdintasun planak Danobatgroupeko sei enpresetatik bostera zabaltzea.

Emakumeek zientzia, teknologia eta ikerkuntzako karreretan sartzeko aukera izatea bultzatzea funtsezkoa da industria sektorearen iraunkortasunerako. Hori dela eta, Danobatgroupek STEM bokazioak eta erreferenteak sortzea sustatzen duten hainbat proiektutan parte hartzen du, hala nola STEAMsare, Bizilabe, ZTIM HUB  eta Elgoibarko Zientzia Azoka proiektuetan. Horrez gain, eremu zientifiko eta teknologikoetan emakumeek egiten duten ekarpena ikusarazten dute, Ada Byron eta Gladys Sariak sarien bidez.

Taldeak, gainera, talentuaren kudeaketa estrategikoaren alde egiten du, eta hori prestakuntzarako eta garapen profesionalerako egiten dituen etengabeko programetan zehazten da, bai eta unibertsitatearen eta enpresaren arteko lankidetzetan ere. Lankidetza horien ondorio dira hainbat erakunde akademikorekin, hala nola UPV/EHUrekin, Nafarroako Unibertsitateko Ingeniarien Eskolarekin (Tecnun), Mondragon Unibertsitatearekin, Deustuko Unibertsitatearekin eta Makina-erremintaren Institutuarekin, egiten diren akordioak. 2022an, 50 pertsona inguruk egin dute egonaldiren bat Danobatgroupen, formatu dual desberdinetan (praktikak, proiektuak, txandakatzeak).

2022an, gainera, industria taldeak Legea Betetzeko Prozedura berria (Compliance) txertatu du bere gobernantza ereduan. Prozedura hori 2021eko abuztuan onartu zen, eta hainbat aldaketa egitea eskatu du, esaterako, Kode Etiko berri bat eta horri erantsitako hainbat politika egitea.

Ingurumenarekiko konpromisoa

Danobatgroupen konpromiso nabarmenetako bat da gizarte osoaren bizi baldintzak hobetzen laguntzea, bereziki bizi baldintzak hobetzeari eta presente dagoen komunitateetan garapen jasangarria sustatzeari arreta eginez. Arlo horretan, azken hiru urteetan, taldeko negozioek 1.400.000 euro baino gehiago bideratu dituzte garapen sozialari lotutako hainbat erakundetara; horietatik ia 500.000 euro 2022an bideratu dira.

Danobatgroupek gizartearekin duen konpromisoa ere Elkarrekin Eragin ekimenaren bidez gauzatzen da, eta taldeak 525.000 euro bideratu ditu ekimen horretara azken hiru urteetan. Proiektu parte hartzailea da, izan ere, erakundeko kideek hiru urteko iraupena duten hiru lankidetza programa proposatu eta aukeratzen dituzte, gero taldeak aurretik aipatutako diru kopurua horietara bideratzeko.

Era berean, inguruan garapen jasangarria erraztearen aldeko apustuaren barruan, 2022an Danobatgroupek tokiko hornidura kateekin lanean jarraitu du. Zehazki, aurreko ekitaldian taldeko negozioak izan zituen hornitzaileen %70 estatukoak ziren, eta horietatik %50 EAEkoak eta Nafarroakoak.

Danobatgroupek badaki oraindik bidea duela egiteko ekonomiaren, gizartearen eta ingurumenaren aldetik bilatzen duen oreka lortzeko, baina, Pello Rodriguez zuzendari nagusiak zehaztu duen bezala, “ziur gaude norabide horretan aurrera urratsak ematen jarraitzen badugu eta gure interes taldeekin elkarlanean eta erakundeko pertsona guztien konpromisoak bultzatzen ere jarraitzen badugu, fabrikazio aurreratuan ez ezik  jasangarritasunean ere erreferentea izatea lortuko dugula”.

Berritu aurrera egiteko

Berrikuntzak funtsezko zeregina du abangoardia teknologikoan dauden eta jasangarriagoak diren produktuak eta zerbitzuak eskaintzeko gai izateko. Prozesu horri esker, taldeak hazkunde erritmo etengabea izan du azken hamarkadetan.

2022an, taldeak 25 milioi euro inbertitu zituen I+Gn, hazkunde jasangarria ahalbidetuko duten teknologia, produktu, zerbitzu, soluzio eta prozesu berriak abian jartzeko.

Horrez gain, Danobatgroupeko enpresa guztiak berrikuntza irekia erabiltzen hasi dira, eta modu sistematikoan garatzen dute. Prozesu horrek ezagutza handiagoa eskuratzeko aukera ematen die taldeko pertsonei, beste erakunde batzuekin aliantzak eginez. Horri dagokionez, 2022an Open Call for Startups” bat abiatu zen, adimen artifizialaren esparruan beste erakunde batzuekin aliantza posibleak identifikatzeko.

Danobatgroupi buruz

Fabrikazio industrialaren eremuan 65 urteko ibilbidea eginda, Danobatgroupek kualifikazio handiko lan taldea dauka, 1.400 pertsona baino gehiagok osatuta. Taldea erreferentziako eragilea da nazioartean, makina-erremintaren eta ekoizpen sistema aurreratuen sektorean.