Kopuru hori arreta-dei gisa ulertzen dut, gizateriak zenbakietatik haratago begiratu eta pertsonak eta planeta babesteko erantzukizun partekatua bete dezan, ahulenengandik hasita. Inor atzean ez uzteko eta mundu bidezkoago eta jasangarriago baten aldeko konpromisoa areagotzeko dugun betebeharraren oroigarri. Horregatik, ez da nahikoa eskoletan eta unibertsitateetan Garapen Jasangarriaren Helburuak irakastea, edo gure enpresek 17 helburu horietan nola laguntzen duten azaltzen duten txosten ez-finantzarioak argitaratzea. Beste urrats bat eman behar dugu, eta elkartasun iraunkorraren alde egin.

Elkartasun iraunkorra arlo sozialean

Ezin baitugu onartu desberdintasun gero eta handiagoak dituen mundu bat, gosea pasatzen duten 850 milioi pertsona baino gehiagorekin eta edateko ura eskuratzeko aukerarik ez duten ia 800 milioirekin. Ezin baitugu onartu, urtero, bost urte bete gabe hil diren bost milioi haur baino gehiago izatea, edo gatazken eta indarkerien ondorioz migratzera behartutako 70 milioi pertsona baino gehiago izatea.

Elkartasun iraunkorra arlo ekonomikoan

Mundua gaur egun aberatsagoa delako, baina inoiz baino desberdinagoa. Biztanleriaren %10 aberatsenarena baita aberastasun osoaren erdia, eta %40 pobreenarena, berriz, %3 baino ez. Baina desberdintasun horiei sexuaren, generoaren, adinaren, desgaitasunaren, arrazaren, jatorri etnikoaren, erlijioaren edo legezko estatusaren araberako diskriminazioa gehitzen badiegu, pertsona, gutxiengo eta talde askok erabat baztertuta jarraitzen dute.

Elkartasun iraunkorra ingurumen arloan

Eta elkartasun iraunkorra ingurumenari dagokionez. Argi baitago planeta hondatzen ari garela eta gure ama lurrarekin amaitzen ari garela. Aurtengo udako beroaz eta euri faltaz kexatzen gara, baina, hala ere, ezer gertatuko ez balitz bezala bizitzen eta kontsumitzen jarraitzen dugu. 2022an, munduan 33.350 milioi tona CO2 baino gehiago isuri ditugu, 4.5 milioi baino gehiago deforestatu dira eta 11 milioi hektarea baino gehiago desertifikatu dira.

Elkartasun iraunkorraren alde egiteak esan nahi du pertsona zaurgarrienekin arduratzea. Bai gure ingurukoekin, baina baita egunero ikusten ez ditugun baina planeta hau partekatzen dugun pertsonekin ere.

Esan nahi du ere, mundua turismorako, gure produktu eta zerbitzuak saltzeko, ikasteko eta lan egiteko leku gisa ikusteaz gain, bizitza ematen digun lekua delako zaindu behar dugun etxe komun gisa ere ikustea.