Edorta Herce Susperregui, MONDRAGONeko Osagaien Dibisioko lehendakariorde berri izendatu dute

Batzorde Iraunkorrak Edorta Herce Susperregui izendatu du MONDRAGONeko lehendakariorde eta Osagaien Dibisioko zuzendari nagusi aurtengo martxoaren 1etik aurrera, eta Javier Oleaga ordezkatuko du karguan. Oleagak otsailean erretiroa hartuko du. CS Stirling, Copreci, Eika, Embega, Fagor Elektronika, Erreka, Orkli eta Tajo kooperatibek osatzen dute Osagaien Dibisioa. Gaur egun, 4.200 langile baino gehiago ditu eta 2023an 700 milioi euro inguruko salmentak izan zituen.

Herce Errenterian (Gipuzkoa) jaio zen 1972an, eta han bizi da emaztearekin eta bi alabekin. Ingeniari industriala da Nafarroako Unibertsitatean (Tecnun), eta karrerako 5. maila Alemanian egin zuen, Braunschweigeko unibertsitate teknikoan. Nazioarteko esperientzia akademiko honek alemana ikasteko eta bere alderdi poliglota indartzeko balio izan zion, gaztelaniaz, euskaraz eta ingelesez ere hitz egiten baitu.

CS Stirling, Copreci, Eika, Embega, Fagor Elektronika, Erreka, Orkli eta Tajo kooperatibek osatzen dute Osagaien Dibisioa. Gaur egun, 4.200 langile baino gehiago ditu eta 2023an 700 milioi euro inguruko salmentak izan zituen

Ibilbide profesionala

Bere ibilbide profesionala GKN multinazional britainiarrean hasi zuen, eta kooperatiben munduarekin izan zuen lehen harremana Tajon izan zen. Kooperatiba horretan, Automozioko negozioaren arduradun gisa hasi zen lanean (2002-2008), eta, ondoren, zuzendaritza nagusian sartu zen (2008-2019). 2020an Osagaien Dibisioko linea zuriko negozioaren zuzendari izendatu zuten, eta 2021ean MONDRAGON Korporazioko Ategi enpresako zuzendaritza nagusiaren ardura hartu zuen. Ategi erosketak kudeatzeko zerbitzuetan espezializatua eta, aldi berean, MONDRAGONeko interkooperazioaren erreferentea da.

Erreleboa, berez, martxoaren 1ean gauzatuko da, eta Hercek berak TU Lankideri esan dionez ilusio handiz dago erronkaren aurrean, etapa berriari ekiteko gogoz, "espero dut nire esperientzia eskaintzea dibisioaren negozioak eta proiektu berriak bultzatzen saiatzeko, bai osagaien kooperatibei bai MONDRAGON Korporazioari etorkizuneko erronken aurrean laguntza eskainiz".