Domecq Taldeak bat egin du Basque Culinary Fundazioaren Patronatuarekin

Domecq Taldea aurrerantzean Basque Culinary Fundazioko Patronatuan izango da. Bertan, hainbat proiektutan hartuko du parte aktiboki, bai prestakuntzakoetan, bai ikerketakoetan, bai Basque Culinary Centerrek sorturiko Ardoaren Institutua martxan jartzen. Lankidetza-hitzarmenak urtebeteko indarraldia, luzatzeko aukerarekin, eta 150.000 euroko diru-hornidura izango ditu.

Domecq Taldearen bat egitea Basque Culinary Center Fundazioaren patronatuko kideek onartu dute eta, beraz, aurrerantzean Domecq patronatuko eskubide osoko kide izango da. Besteak beste patronatuko zazpi sukaldariek bultzatu dute Espainian parekorik ez duen unibertsitate-proiektu hau: Eneko Atxa, Pedro Subijana, Juan Mari Arzak, Martin Berasategui, Karlos Arguiñano, Andoni Luis Aduriz eta Hilario Arbelaitz sukaldariek eta Mondragon Unibertsitateko errektore Iosu Zabalak, AZTI-Tecnaliako zuzendari Rogelio Pozok eta erakunde publikoetako eta beren jarduera-eremuan liderrak diren sektore gastronomikoko enpresetako ordezkariek (Fagor Electrodomésticos, Eroski, Martiko, Heineken eta COVAP enpresetakoek).

Hitzarmena

Hitzarmenari esker, Gastronomia eta Sukaldaritza Arteen Graduko prestakuntza-programan ardoarekin eta edari destilatuekin (nekazaritzako lehengaiak destilatzearen bidezko edari alkoholdunekin) lotutako jarduerak egingo dira, indarreango planaren barruan dagoen sumilleria ez bestelakoak hain zuzen. Helburua? Ardoa ikasleei hurbiltzea zenbait materia ezagutzera ematearen bidez, hala nola, ardoa egiteko metodoak, ardoaren ezaugarriak, osaera, jatorrizko izendapenaren nondik norakoak, kokteleriaren garapena eta abar.

Ostalaritzako profesionalek eta zaleek ere izango dute beren leku propioa, ardoari eta edari destilatuei buruzko ezagutzetan sakontzeko. Bada, horretarako propio sortu diren ikastaroetan, mintegietan, lantegi praktikoetan eta dastatzeetan parte hartu ahal izango dute.

Hitzarmenaren ondorioz, Basque Culinary Centerren instalazioak erabili ahal izango dituzte Espainiako Domecq Taldeko upategiek eta destilategiek, BCCren Campuseko partaide izango baitira. Horietan, prestakuntza-jarduerak antolatuko dira, unibertsitate-graduko ikasleentzat.

Era berean, bi erakundeek lankidetzan jardungo dute Basque Culinary Centerrek sortutako ekimena garatzen, hau da “Ardoaren eta edari destilatuen Institutua” garatzen. Prestakuntza-proiektu horretan ikastaroak ematea aurreikusten da, baita ardoen eta edari destilatuen dastatzeak egitea ere. Prestakuntza-programa 2013/2014 ikasturtearen hasieran jarriko da martxan.

Bestalde, I+G arloak ere bere ibilbide propioa izango du hitzarmenaren ondorioz. Izan ere, bi erakundeak lankidetzan arituko dira proiektu organoleptiko batean, zentzumenezko ikerketa bat eginez vodka eta tonikaren arteko garapena baloratzeko, gaur ostalaritzan modan dagoen gin-tonicaren ordezko gisa. Gainera, Basque Culinary Centerrek eta Domecq-ek Azpilikueta ardoaren zentzumenezko dastatze bat garatuko dute elkarrekin. Ardo horrek prestakuntza-beka bat abian jartzeko balioko du: Azpilikueta beka. Urtean behingoa izango da eta unibertsitate-graduko ikasle bati emango zaio, lehiaketen, proiektuen eta abarren bidez hautatuta.