Danobatgroupek Bizipoza eskola proiektuaren aurkezpena hartu du

Denona eta denontzat izango den Euskal Herria eraikitzeko bidean, Bizipoza Eskola proiektua, gaur Elgoibarko (Gipuzkoa) Danobatgroup industria taldearen egoitzan aurkeztua, hezkuntza inklusiboaren beharrizan bati erantzuteko iritsi da.

Parte hartu dute Leire Elizegi Beloki Bizipozako koordinatzaileak, Jose An­tonio Hidalgo Danobatgroup-eko lehendakariordeak, Nerea Godoy Fuentes Bizipoza Eskolako koordi­natzaileak eta proiektuaren proba pilotuetan parte hartu duten Amassorrain ikastola eta Aratz ikastola ikastetxeek eta Hilargi, Arnasa eta Ndank Ndank elkarteetako kideek.

Jose Antonio Hidalgo Danobatgroup-eko lehendakariordeak adierazi duenez, “pertsonengan oinarritzen den proiektu sozio-enpresarial bat izanik, guretzat ezinbestekoa da inklusioa eta izaera bereziko gaiak lantzen dituen Bizipoza bezalako elkarte bati baliabideak eskaintzea”.

Ildo beretik, Bizipozak agerraldia aprobetxatu du industria taldeari eskerrak emateko azken urteotan egindako ekarpen ekonomikoagatik, Bizipoza Eskola bezalako proiektuak bultzatzeko. “Proiektu hau garatzeko 3 urtetako lana babestu duzue eta, beraz, uste dugu toki egokiena dela gaur aurkezpen hau egiteko”, adierazi du Leire Elizegi Belokik.

Danobatgroupek gizarte erantzukizunarekin lotutako proiektuak bultzatzeko duen Elkarrekin Eragin programari esker finantzatu da proiektu guztia.

Zergatik sortzen da Bizipoza eskola?

“Elkarteak sortzen diren arrazoi berdinagatik. Behar bat dago. Badaude haur eta familien eskubide batzuk bete gabe daudenak eta horren aurrean familiak edo norba­nakoak elkartu egiten dira horri aurre egiteko. Guk gauza bera egin dugu. Gai ezberdinetan aritu eta adi­tuak bildu ditugu eta gida hauek sortu ditugu elkarrekin, Bizipozaren baloreekin zipriztintzeko norbera eta bere ingurukoak”, azaldu du Nerea Godoy Fuentesek.

Webgunean hainbat material bildu dira: gida didaktikoak, material osagarriak eta egutegia. Horiei es­ker, gai ezberdinak landu ahal izango ditugu: Norbere buruaren ezagutza eta taldekidetasuna; genero rolak, identitatea eta transexualitatea; familia aniztasuna eta sexu orientazioa; heriotza; kulturanizta­suna; aniztasun funtzionala; gaixotasunak; eta boluntariotza.

Gida didaktikoak

Gai horiek guztiek hezkuntza arautuko hainbat mailatara bideratu dira: HH, gela egonkorra, LH, DBH eta goi mailako hezkuntza. Hezkuntza ez-arautuan, berriz, hizkuntza-mailaren arabera sai­lkatu dira gida didaktikoak. Maila guztietarako gai berdinak proposatu dira baina hizkuntza-maila bakoitzera egokitzen da jarduera oro.

“Gure proposamena irekia da norberak bere testuingurura egokitu dezan. Jarduerak egokitzen dira Nafarroako eskola txiki batera nahiz Bilbo erdiguneko ikastola handi batera”, azaldu dute. Izan ere, Euskal Herriko lurralde guztietan 8 ikastetxerekin eta Leioako EHUko magisteritza es­kolarekin proba pilotoak burutu dira. Horretaz gain, herrietan, aisialdi talde, euskaltegi eta beste hainbat eremutan ere bai.

Herrigintza atalari dagokionez, Euskal Herriko herri eta auzoetan Bizipoza dinamikak sortzeko baliabideak aurki daitezke. Adibide gisa, Lasarte-Oria herrian eta Bilboko Uribarri auzoan gara­tutako adibideak aurki ditzakegu bizipozaeskola.eus. webgunean.

Erantzunkizun sozialaren adibidea

Bizipoza Eskola beste adibide bat da, Danobatgroupen konpromiso soziala bermatzen duena eta taldeak bultzatutako beste ekimen batzuekin bat egiten duena. Taldeak tokiko ingurunean balioa sortu nahi du, bere irabazien zati bat garapen ekonomikoa eta soziala sustatzen duten jardueretara bideratuz.

Testuinguru horretan kokatzen da Elkarrekin Eragin programa, Danobatgroupek 2018an abian jarritako ekimena, Danobatgroupeko pertsonen inplikazio aktiboaren bidez eraldaketa sozialeko ekintzak babesteko. Gainerako laguntzak ez bezala, Elkarrekin Eragin programan erakundeko pertsonek beraiek proposatu eta aukeratzen dituzte. Hiru urteko iraupena duen programa denez, erakunde onuradunek epe luzerako konpromisoa eta laguntza izan dezakete. Lehen edizioak 2018-19-20 urteetan izandako arrakastaren ondoren, 2021ean Taldeak bigarren edizioari ekin zion (2021-22-23 urteak), hurrengo hiru erakundeak babestuz: Bizipoza, WOP eta Gautena.