Danobatgroup-ek 337 milioi euroko fakturazio historikoa izan du, %90 nazioarteko merkatuetan

Danobatgroup industria taldeak 2023an sendotu zuen fabrikazio aurreratuan eta makina-erremintan zuen nazioarteko lidergoa, ASG irizpideek (Ingurumen, Gizarte eta Gobernu Onaren irizpideak) gidatuta eta ingurumenarekin, gizartearekin eta bere erakundea osatzen duten pertsonekin konpromiso sendoa izanda, bere enpresa ereduan hasieratik presente egon den bereizgarria baita. 

Hala ikusten da bere hirugarren jasangarritasun memorian, zeina bere webgunean argitaratu eta eskuragarri dagoen; izan ere, dokumentu horretan erakusten ditu pasa den urtean lortutako emaitza nabarmenak: 337 milioi euroko fakturazio historikoa, fakturazioaren %90 baino gehiago nazioarteko merkatuetatik etorritakoa, eta %9tik gorako inbertsioa I+G+Bn (28 milioi euro baino gehiago). 

Inbertsio horretan ez du alde batera utzi bere ingurune hurbila ere, bere lurraldean aberastasuna eta enplegua sortu baititu, bere plan estrategikoak markatutako araua den heinean. 

Zentzu horretan, kooperatiben egoitza nagusietako instalazioen modernizazioa, egokitzapena eta handitzea da egungo jarduera gunea. Soraluceren muntaketa planta berria inauguratu zen 2023an, eta plantak, gainera, LEED Ziurtagiria (Energia eta Ingurumen Diseinuko Lidergoa) du. Danobat, zeinak 2024an inauguratutako planta berri bat daukan, eta Goimek ere taldean guztira 50 milioi eurotik gora inbertitzeko plan horretaz baliatuko dira.

Nazioartean, nabarmentzekoa da 2023an Shangain bikaintasun zentro berri bat ireki izana. Txina, Estatu Batuak, Alemania, Italia eta Mexiko dira gaur egun taldea kokatuta dagoen merkatu nagusiak. 

Hori guztia posible izan da Danobatgroupen bide orriak betidanik markatzen duen natura eta esentzia kooperatibo eta jasangarriari esker, hazkunde ekonomikoaren, ingurumenaren babesaren eta ongizate sozialaren arteko oreka bilatuta. 

Ingurumen inpaktua murriztea

Memoriak ASG irizpideei jarraituz egindako ekintzak jasotzen ditu, eta horien artean nabarmentzen dira, adibidez, bere jarduerak ingurumenean duen inpaktua murriztearekin lotura dutenak.

Beste neurri batzuen artean, bere plantetako estalki gehiagotan plaka fotovoltaikoak jartzen jarraitu da. Guztira, 4.160 panel instalatu dira, eta kontsumitzen den energiaren %20 iturri horretatik etorritakoa izatea lortu da. Horrez gain, milioi 1 euro baino gehiago inbertitu dira kanpoaldean eguzki baratze bat jartzeko, zeina aurreikuspenen arabera 2025ean abian jarriko baita. Ekintza horiek adibide dira energiaren heren bat autokontsumorako energia berriztagarriaren sorkuntza propiokoa izateko helbururantz aurrera egiteko.

Era berean, taldea nabarmen aurrera egiten ari da etorkizunari begira deskarbonizazio plana sortzeko, taldeko kooperatiba gehienek 2023an egindako karbono aztarnaren hiru irismenen neurketaren babespean. 

Danobatgroupeko enpresen produktuek ingurumenean duten inpaktuari dagokionez, azpimarratzekoa da 2023an Soraluceren 4 makina modelo berrik Ekodiseinuko ziurtagiria eskuratu dutela, eta gaur egun 27 modelo daudela guztira ziurtagiri horrekin.

Gainera, 2023an Danobatgroupen Mugikortasun Planaren lehen ekintza gauzatu zen: langileen artean auto partekatuaren erabilera bultzatzeko eta areagotzeko aplikazio bat sortu zen. 

Pertsonak eta kudeaketa eredua

Arlo sozialean, Danobatgroupek 2021-2024 aldirako azken Plan Estrategikoan kalitatezko enplegua sortzeko jarritako helburuak bete zituen, eta urtetik urtera trebakuntza handiko gero eta profesional gehiago ditu, jada 1.462 laguneko plantilla baitu mundu osoan.

Era berean, taldea oraindik ere kudeaketa kooperatiboko eredu etiko, solidario eta parte hartzailearekin ari da lanean, Mondragon Korporazioaren esparruaren barruan. Eremu horretan, 2023an Danobatrgoupek Legeak Betetzeko Prozeduran neurri berriak sartu ditu, eta ASG eremuetako hiru politika berri sortu eta onartu dira. Jasangarritasun politika, ekintza sozialeko politika eta aniztasun eta berdintasuneko politika.

Horrela, Danobatgroupek bere jarduera guztietan edozein pertsonarentzat aukera berdinak izan daitezen egiten duen apustua are irmoagoa da. Gaur egun enpresa guztiek berdintasun plan propioak dituzte pertsonen kudeaketa hobetzeko eta genero ikuspegitik kudeatzeko, komunikazio ez-sexista sustatuta eta plantilla berdintasun gaietan eta beste alderdi batzuetan sentsibilizatuta. 

Halaber, interkooperazioko proiektuak bultzatzen jarraitu du beste enpresa eta talde batzuekin, interkooperazioa baita Mondragonen barruko kooperatiben ezaugarri bereizgarria. Bereziki, Fagor Arrasaterekin elkarlanean aritu da Laser Blanking teknologia lantzeko edo Ategirekin, eguzki baratzean inbertitzeko, proiektuetako bi aipatzearren.

Ingurumenarekiko konpromiso soziala

Danobatgroupek jasangarritasunarekin duen konpromisoa erakundetik harago doa, eta gizarte osora zabaltzen da. Hiru urtean 1,5 milioi euro baino gehiagoko ekarpena egin zaie izaera sozialeko ekimenei, 200 erakunde baino gehiagori. 

Era berean, taldeak Elkarrekin Eragin programa parte hartzailea garatzen jarraitzen du. Programa horretan, erakundeko pertsonek ingurunean eragin positiboa duten lankidetza proiektuak proposatzen eta aukeratzen dituzte. 2023an bukatu zuen programa horren bigarren edizioa, eta 523.000€ erabili ziren hiru erakunderi laguntzeko. Laguntza programaren 2024-2026 ziklorako hautaketa prozesua ere abiatu zen.

Ildo horretan bertan, taldeak tokiko hornitzaileen aldeko apustua egin zuen, eta gaur egun bere hornitzaileen %80 estatukoak dira eta %70 Euskal Autonomia Erkidegoak eta Nafarroakoak.

Era berean, arreta berezia eginda belaunaldien artean eta, bereziki, emakumeen artean bokazio zientifiko-teknologikoak sustatzeari, 2023an taldeak Mondragon City Challenge, ZTIM Hub, Zienzia Azoka, Bizilabe, Gladys Sariak, Ada Byron sariak, IMH sariak edo GAL/MAL Mondragon sariak babestu zituen, eta 2024an First Lego Leaguerekin beste lankidetza bat lantzen aritu zen.

Danobatgroupi buruz

Industriako fabrikazioari aplikatutako teknologikoen alorrean 70 urteko ibilbidea eginda, Danobatgroupek trebakuntza handiko 1.400 pertsona baino gehiagok osatutako plantilla bat dauka, eta 337 milioi euroko fakturazioa. Taldea erreferentziako eragilea da nazioartean, makina-erreminten sektorean eta industriako fabrikazioari aplikatutako teknologietan.