Arimadun sukaldaritza

Esperientzia honen magia Josu Vazquezek sortzen du, Ausolaneko sukaldariak eta Fagor Ederlaneko sukaldeburuak, zeinak pasioz eta maisutasunez gidatzen baitu eguerdiko etenaldia gozamen eta konexio une bihurtzen duen talde bat.

30 urteko esperientzia du Josuk sukaldean eta filosofia argia du; elikatzeko ez ezik, gozatzeko ere prestatzen du bazkaria. “Nire etxean bezala prestatzen dut hemen janaria”, dio, kalitatearekin eta xehetasunezko zaintzarekin duen konpromisoa azalduz.

Josuren ibilbidea Frantzia, Girona, Llanes edo Peñiscolako hainbat jatetxetan hasi zen, non sukaldaritza tradizionalaren balioa eta gauzak hasieratik ondo egitearen garrantzia ikasi zituen. 1994an hasi zen Ausolanen, sukaldaritza kolektiboko zerbitzuetan liderra den kooperatiban, eta ordutik bere ofizioa hobetzen dihardu, sukaldearekiko duen pasioa kudeatzen dituen jantokietara eramanez.

“Gogoan dut nire lehen maisuek beti azpimarratzen zutela kalitatea, prozesuaren urrats bakoitza zaindu behar zela, eta hori ez dut inoiz ahaztu”, azaldu du.

Xehetasunetan arreta jartzeak eraman du Fagor Ederlaneko langileen errekonozimendua izatera, badakitelako etxean egindako moduko platerak dituztela, dedikazioz eta zaporez beteak.

Bikaintasunarekin konprometitutako taldea

Fagor Ederlaneko jantokian, Josuk emakume talde profesional batekin egiten du lan, eta “lankide izugarri” gisa definitzen ditu, eta lerro hauen bidez eskertu nahi izan die egunero egiten duten lan guztia. Talde sendoa osatzen dute, eta goizeko 7:30ean hasten dute eguna, bazkalorduan dena prest egongo dela bermatzeko. Eguneroko menuak taldearen sormena eta profesionaltasuna islatzen du, etxean egindako ogiarekin eta gaztazko coulant-arekin, esaterako.

Plater nagusiez gain, Fagor Ederlaneko langileek entsalada bufeta dute, unean bertan prestatutako askotariko osagaiekin, hala nola barazki pastelak edo endibia beteak. Eskaintza freskoa eta mahaikideen gustuetara egokitua mantentzen ahalegintzen da Josu, eta langileen gogobetetze maila erruz gainditu du.

Kooperatibaz harro

Fagor Ederlanen ingurune kooperatiboan lan egiteak esanahi berezia du Josurentzat, Ausolaneko bazkide ere badelako.

“Denok helburu berarekin lan egiten dugun talde batekoa izatea, hau da, bezeroa gogobetetzea eta ondo egitea, harro egoteko arrazoia da”, adierazi du.

Josuk bereziki baloratzen du Ausolanek bere bezeroen beharretara egokitzeko duen gaitasuna. Horren barruan sartzen dira enpresetako jantoki handiak eta zentro txikiak, betiere kalitate eta hurbiltasun estandar altuak mantenduz.

Fagor Ederlanen, espiritu kooperatibo hori egunez egun bizi da. Josuren ustez, bere lana ez da soilik lan profesionala, kooperatibako kideen ongizatean laguntzeko modu bat baizik. Pozik handiena da Fagor Ederlaneko langileak janariaz gozatzen ikustea. “Jaten ikusten ditut, ditudan elkarrizketak… oso pozik noa”, esan du. Sukaldaritza kolektiboak dituen erronkak gorabehera, hala nola ahosabai desberdinetara egokitzea edo mahaikide askoko menuak kudeatzea, Josuk dio bere lana gustora egiten duela.

Erronkak eta aukerak

Sukaldaritza kolektiboa etengabe aldatzen ari da, eta gero eta aukera osasungarriagoak eta jasangarriagoak eskatzen ari dira. Josuk, oztopo gisa ikusi beharrean, ikasten eta egokitzen jarraitzeko aukera gisa ikusten du. “Beti daude hobetzeko moduak. Osagaiak pixka bat landuta, kalitate handia eman dezakezu ”, ziurtatu du.

Bere grinarekin, konpromisoarekin eta esperientziarekin, Josu Vazquezek egunero erakusten du sukaldaritza onak gorputzak elikatzeaz gain, inspiratu, konektatu eta motibatu ere egiten duela. Fagor Ederlanen, hari esker, bazkaria eguneko une bat baino askoz gehiago da: harro egoteko eta gozatzeko arrazoi bat.

Osasuntsua, osasungarria, segurua, jasangarria eta zaporetsua

Josuk askatasuna du menuak diseinatzeko, prozesu bakoitzean segurtasuna eta kalitatea bermatzen duten Ausolan printzipioen errefeentzia galdu gabe, betiere ikuspegi argi batekin: elaborazio osasungarri eta jasangarrien alde egitea. Horrek esan nahi du frijitu gutxiago, plantxan egindako janari gehiago eta aukera begetariano gehiago daudela.

Ikuspegi hori guztiz bat dator Ausolanen leloarekin: “Gure menuak osasungarriak, zaporetsuak, jasangarriak eta seguruak dira”. Jasangarritasuna ez da plateretan bakarrik islatzen, baita produktuen aukeraketan ere. Lehengaien % 85 tokiko hornitzaileetatik datoz, eta Josuk eskaerak doitzen ditu garraio kopurua murrizteko, ingurumen inpaktua minimizatzeko. “Garrantzitsua da, plateretan kalitatea eskaintzeaz gain, modu arduratsuan egitea ere. Hemen denetan pentsatzen dugu: zaporean, osasunean eta ingurumenean”, adierazi du.