Irakurriena
- 1. “Abentura zirraragarria izan da”
- 2. Hirekin industria jasangarriko zentro berritzailea inauguratu du Mondragon Unibertsitateak
- 3. Iñigo Laskurain Pagaegi, MONDRAGONeko lehendakariorde eta Automozio Dibisioko zuzendari orokor berria
- 4. Vicente Atxa, MONDRAGONeko lehendakariorde eta Ezagutza Dibisioko zuzendari orokor berria
- 5. “Definitu dugu zer ekarpen egin nahi diogun gizarte honi gure ikasleen bitartez”
- 6. Imanol Oleaga Mendiaratz, Domusa Teknikeko zuzendari nagusi berria
- 7. Orkli Biotz enpresan sartu da % 11,11ko parte-hartzearekin
- 8. Danobatgroup-ek 337 milioi euroko fakturazio historikoa izan du, %90 nazioarteko merkatuetan
- 9. Dikarrek bere ekoizpen planta modernoa inauguratu du Arrasaten, etapa berri bati ekiteko
- 10. MONDRAGONen Komunikazio Foroaren edizio berria egin dute
40 urte kooperatiben zerbitzura
![Card image cap](https://www.tulankide.com/eu/40-urte-kooperatiben-zerbitzura/@@images/f723c2d0-f053-447a-b836-5583ac3d486f.jpeg)
Iñigo Urkullu lehendakaria eta Eusko Legebiltzarreko presidente Bakartxo Tejeria buru zirela egin da gaur eguerdian Euskalduna Jauregian Euskadiko Kooperatiben Goren Kontseiluaren 40. urteurreneko ekitaldia.
Patxi Olabarria kontseiluko lehendakariak enpresa kooperatiboaren ereduari balioa emanez jardun du nagusiki bere diskurtsoan
Bere historiako uneren batean Kontseiluaren Osoko Bilkuran parte hartu duten pertsonek egindako lana aitortzeko egin da ekitaldia, besteak beste.
Horrez gain, 40 urte hauetako mugarri nabarmenenak eraikitzen lagundu duten erakundeen inplikazioa eta konpromisoa eskertzeko balio izan du. Ekitaldian lau hamarkada hauetako historia errepasatu da, hiru uneren bidez: eraiki, indartu eta bultzatu.
Lehen zatian Kontseiluko presidenteei aitortza egin zaie, Bakartxo Tejeria Eusko Legebiltzarreko presidentearen eskutik. Luis Irazabal, Javier Sanz, Jose Felipe Yarritu, Alfredo Ispizua, Maria Ubarretxena, Javier Goienetxea eta Patxi Olabarria egungo presidentea egon dira bertan. MONDRAGON Korporazioko presidente Iñigo Ucin-ek ere parte hartu du ekitaldian.
Era berean, Kontseilua osatzen duten erakundeek Osoko Bilkuran ordezkari izan dituzten ehun kontseilukideei omenaldia egin zaie bihotz-bihotzez. Hau da, Konfekoop, Eusko Jaurlaritza, hiru foru aldundiak eta hiru euskal unibertsitateak ordezkatzen Osoko Bilkuran parte hartu dutenei.
Bigarren zatian, Euskadiko Kooperatiben Goren Kontseiluaren egungo uneaz hitz egin da. Patxi Olabarria kontseiluko lehendakariak enpresa kooperatiboaren ereduari balioa emanez jardun du nagusiki bere diskurtsoan, enpresa tradizionalerako eredu erreferentea den heinean. “Enpresa kooperatiboak kalitate handiagoko enplegua sortzen du, erabakietan parte hartzeko aukera ematen du, eta soldata eta genero arrakala murrizten du. Kooperatibei lotutako balio horiek dira gazteek gero eta gehiago eskatzen dituztenak, eta gazteak dira eta izango dira Euskadin etorkizuneko ekoizpen eta enpresa sarea eratuko dutenak”.
Hain zuzen ere, euskal kooperatibismoaren etorkizuna izan da ekitaldiaren hirugarren zatiko protagonista, hiru gaztek, etorkizuneko kooperatibistak, eta Xabier Igoa bertsolariak ordezkatuta.
Etorkizunari begiratzearekin batera, Kontseiluak bere marka berria aurkeztu du: Kooperatiben Kontseilua irudi berritu batekin, horizonte berriari aurre egiteko, enpresa kooperatiboek Euskadiko garapen ekonomikoari eta sozialari ekarpen handiagoa eginez.
Iñigo Urkullu lehendakariaren hitzekin eman zaio amaiera ekitaldiari.