“Gero eta digitalagoa eta konektatuagoa den mundu baterako soluzio elektronikoak eskaintzen dituen hornitzaile europarra gara”

MONDRAGONen bizitza osoa eman ondoren, Aitor Soria Fagor Elektronikara iritsi da, bere lan-bizitzan ziklo berri bati ekiteko: “Mondragon Goi Eskola Politeknikoan hasi nintzen, Osagaien Dibisioan egon nintzen eta Embega, Batz eta Eikako zuzendaritzatik pasa naiz azken 10 urteotan. Orain Fagor Elektronikaren txanda da, bitxia bada ere, Dibisioko nire garaian, eta arrazoi teknikoengatik, Fagor Elektronikako 1.650 bazkide zenbakia izan nuen, eta, beraz, etxera itzuli naiz”.

Nola ari zara bizitzen itzulera?

Oso pozik eta motibatuta nago. Eikako kudeatzaile gisa, harreman handia izan dut Fagor Elektronikarekin, eta uste dut potentzial izugarria dugula. Fagor Elektronika soluzio elektronikoetan eta digitalizazioan aditua den fabrikatzailea da, bezero bakoitzaren beharretara egokitzeko malgua. Bost negozio ditu: Erdieroaleak, EMS, Multimedia Soluzioak, Smart Data Services eta Negozio Berriak. Eskaintza izugarri dibertsifikatua, goranzko eta balio erantsi handiko sektoreetan.

MONDRAGON ezagutzen duzu eta elkarlanak liluratzen zaitu. Korporazioaren estrategia elkarrekin lankidetzan sortzea, proposatzea eta arlo horietan sakontzea da.

Jakina liluratzen nauela. Gure artean lankidetzan aritzeko ahalmena dugu, Osagaien Dibisioaren barruan, baina baita beste kooperatiba eta enpresa batzuekin ere. Kooperatiba guztiak gaude inguruan lanpostuak eta aberastasuna sortzeko, hurrengo belaunaldientzako ondare hobea utziz. Hori egiteko aukerak biderkatu egiten dira subjektua danok garenean, zu eta ni erabili beharrean, erabil ezagun ‘gu’. Horretarako, kooperatibetako buru garenok maila eman behar dugu, eta ez da beti gertatzen. Esan daiteke Osagaien dibisioaren barruko giroa konplizitate eta lankidetza handikoa da, oso une interesgarrian gaude.

Irailetik zurekin egon da Mikel Trojaola, aurreko zuzendari nagusia. Kontaiguzu, nolakoa izan da kargu hartzea Mikelen eskutik?

Bikaina izan da, eta eskerrak eman behar dizkiot Mikeli. Plan Estrategikoa idazteko prozesuan murgilduta gaude, eta 2025ean negozio bakoitzaren plan zehatzak egingo ditugu. Smart Data Servicesekin hasi gara, eta gainerako negozioekin jarraituko dugu. Oro har, negozioen barruan ildo berriak ireki ditugu, eta berrikuntza lantzen jarraitu behar dugu, gure negozioak eta zerbitzuak finkatu eta sendotzeko.

“Europako diodo ekoizle bakarra gara, eta Espainiako erdieroale ekoizle bakarra. Ilusioz beteriko etorkizun bati aurre egiteko egoera ezin hobean gaude”

Zer iradokitzen dizu izenburu honek? “Fagor Electrónica 2025: Berrikuntza, proiektu berriak eta hazkundea”

Fagor Elektronikak aurrerapen estrategikoz betetako 2024. urtea itxi zuen, berrikuntza teknologikoan eta garapen industrialean lider gisa duen posizioa sendotuz. Iaz urrats garrantzitsuak eman ziren bere operazioen hedapenean, ontzigintzan, mugikortasun iraunkorrean eta teknologia berrien ikerketa eta garapenean presentzia indartuz. Horretan ari gara. Hazkundeari dagokionez, 2024a ia 90 milioi eurorekin amaitu dugu. Eta 25eko Gestio Plana 100 milioitik gorako fakturazioarekin taxutu dugu, beraz, bi digituak gainditzea espero dugu, mugarri bat Fagor Elektronikarentzat.

Berrikuntzaz eta sendotzeaz hitz egiten duzu. Zer da lehenengo?

Berrikuntzaren bidez haziko gara eta sendotuko dugu gure proiektu kooperatiboa. Finkatu ditugu zenbait arlo: (FMS) Fagor Multimedia Solutions. Etorkizunerako funtsezko urrats bat eman behar dugu. 2024. urteko mugarri garrantzitsuenetako bat Fagor Multimedia Solutions sortu izana izan zen, Triax Digital Solutions (lehengo Ikusi) erosi ondoren, multimedia-soluzioen sektorean hazteko.

Ontzigintzan ere PERTE bat lortu dugu Navantiarekin. Horrela, PERTE Navalen funtsei esker, proiektu berriei ekin ahal izango zaie, Fagor Elektronika espezializazio handiko eta kalitate- baldintza handieneko sektoreetan erreferente gisa kokatuko duten teknologien garapena bizkortuz, lehen mailako bezeroekin elkarlanean.

Bestalde, erdieroaleen esparruan, Fagor Elektronikak berrikuntzarekin duen konpromisoa ez da gelditzen, eta aurrera jarraitzen du Silicon Carbideren (SiC) teknologiaren garapenean. Teknologia hori funtsezkoa da gailu eraginkorragoak eta iraunkorragoak fabrikatzeko.

Enplegua sortzen ere garrantzitsua da enpresak egin duen ibilbidea. Talentua sortuz, sendotuz eta erakarriz, hala da?

Fagor Elektronikak pertsonen aldeko apustua egiten jarraitzen du, eta horren erakusgarri da azken 10 urteetako hazkundea, 417 pertsonatik 638 pertsonako kolektibo batera igaro baita kooperatiba, tokiko enplegua sortzeko eta eskualdean talentua garatzeko konpromisoa berretsiz. Hori da talentua sortzea, sendotzea eta erakartzea. Uste dut Fagor Elektronika oso proiektu erakargarria dela gaitasun guztiak garatu nahi dituztenentzat.