“Euskaraldiarekin batera, euskara ikasteko tresna berri bat garatu da”

Eroskik bertako langileen artean euskararen erabilera sustatzeko dinamika bat martxan jarri du MondragonLinguarekin batera. Horren inguruan aritu gara Joseba Bartolome, Mondragon Linguako Komunikazio arduradunarekin eta Ainhoa Berriozabal eta Xabier Olacireguirekin, Pertsonen garapeneko teknikariak egoitza sozialean eta salmenta puntuetan hurrenez hurren.

Nola sortzen da elkarlan hau?

Ainhoa Berriozabal: Hasieran kontsulta soil batetik. MondragonLinguari euskara ikasteko sarean dauden baliabide ezberdinen gaineko informazioa eskatu genion, hau era egokian ordenatu eta gure lankideei eskaintzeko. Gero modu naturalean elkarrekin urratsak ematen joan gara, ekimena bere osotasunean egituratu arte.

MondragonLinguarekin dugun harremana gertukoa da, gure lankide batzuk beraien klaseak jasotzen dituztelako.

Zein da proiektu honen lan dinamika?

Joseba Bartolome: Euskara ikasteko edo euskaran modu autonomoan sakontzeko eduki piloa dago sarean, eta zentzu honetan garrantzitsua da egokia edo baliagarria dena identifikatu eta egoera bakoitzera aplikatzea. Gure kasuan HABEren sailkapena aintzat hartu dugu, A1etik C1 mailara bitartean sailkatuz parte-hartzaileak, eta beraien maila ezagutzeko atariko froga bat egin zaie. Hortik aurrera, MondragonLinguaren baliabideekin plataforma propio bat sortu dugu Eroskiko langileentzat. Behin abiapuntua definituta partaide bakoitzari helburu zehatz batzuk esleitu zaizkio, eta helburu honetara iristeko hiztegia, gramatika edo entzumena lantzeko ariketak aurkituko ditu plataforman.

A.B.: Hasiera batean genuen ideia sinpleagoa zen, eta elkarlanari esker ideia ezberdinak atera dira eta hainbat hobekuntza sartu ditugu atarian. Adibidez: gramatika atala, Eroskin erabiltzen ditugun hitzekin egindako glosarioa, MondragonLinguaren itzultzaile neuronala...

"Bi kooperatiben arteko elkarlanari esker ideia ezberdinak atera eta hobekuntzak garatu ahal izan ditugu"

Ekimena Euskaraldiarekin batera jarri da martxan.

Xabier Olaciregui: Prozesua 2022aren hasiera jarri genuen martxan, baina Euskaraldiarekin batera egin dugu publiko. Prozesua martxan jarri genuenean hor zegoen Euskaraldiaren data, eta gure helburua data hauetara garaiz iristea zen, aukera bezala identifikatzen genuelako.

Uste dugu Euskaraldiak lana erraztu digula, bultzada eman diola proiektuari, batez ere oihartzun gehiago izateko, baina hau lehen pausu bat baino ez da. MondragonLinguarekin elkarlanean oso gustura gabiltza, eta emaitzak momentuz nahiko positiboak dira. Jendea apuntatu da, eta hori bada abiapuntu bat. Hemendik aurrera jarraipena egitea tokatzen zaigu.

J.B.: Euskaraldiaren aitzakiarekin ekarpen potente bat egin dela esan dezakegu, euskara ikasteko tresna berri bat sortu baita.

Emaitzei erreferentzia eginez, nolakoak ari dira izaten?

A.B.: Momentuz oso informazio orokorra dugu, baina duela aste bi hasi ginen komunikazioarekin, eta dagoeneko 128 pertsona apuntatu dira. Oraindik ez dakigu zehatz-mehatz egoitza zentraleko, dendetako edo plataformako lankideak diren, ez garelako datuen azterketan murgildu. Oso denbora gutxi da plataforma publiko dagoela, eta une honetan esfortzu guztia komunikazioan jartzen ari gara.

X.O.: Garrantzitsua da lehen hamar egunetan 128 pertsonak izena eman izana. Guzti hauek denboran zehar plataformak aktibo egon eta prozesuari jarraipena emanez gero emaitza oso positiboa izango da. Hor dago gakoa hain zuzen, jarraipenean.

J.B.: Bat nator emaitzen interpretazio honekin. Gure ikuspuntutik oso garrantzitsua da Eroskik mahai gainean jarri duen erronka hau. Eroskiren langileen profila hobeto ezagutzeko aukera ematen digu, eta ondorioztatu dezakegu zein den hauek izan ditzakeen euskara ikasteko modurik aproposena. 

"Lehen egunetan jasotako erantzuna oso positiboa izan da"

Zein da egiten duzuen balorazioa?

J.B.: Guretzako etengabeko ikasketa prozesu bat da hau. Ikasteko baliagarria den tresna autonomo, erreal eta egokitua garatzetik ikasgai ezberdinak atera ditugu. Alde batetik, Eroskirekin batera esparruan sakontzeko aukera ezberdinak aurkitu ditugu, eta etorkizunean ikasgai hauek beste kooperatiba batzuekin aplikatu eta hauetan inplementatzeko moduan izango gara. Zentzu honetan, balioan jarri behar da Eroskik izandako jarrera, Euskal Herrian kokatuta egonik euskararekiko erakutsitako konpromisoa. Eta konpromiso hori praktikara eramateko MondragonLingua bidelagun bezala aukeratzea harro egoteko arrazoia da guretzat.

X.O.: Eroskin ideia oparo bat bezala hartu dugu, eta espero dugu langileek ere horrela hartzea. Behin bidea irekita dagoela elkarlanean jarraitzeko aukera polita dugu.

A.B.: Ziur batera ideia berriak aterako zaizkigula!

J.B.: Azken finean mota hauetako ekimenen onuradun bakarra euskara da. Euskara lan egiteko, bizitzeko eta ondo pasatzeko hizkuntza izan behar dugu, eta baita ere erosketak egiteko hizkuntza.