Errektore Kontseilua eta kontseilu-kideak protagonista, TU Lankideren azken zenbakian

TU Lankideren 622. zenbakia dagoeneko kalean dago, kooperatiba eta gainerako banaketa puntuetan banatzen ari dira aste osoan zehar.

Ikus aldizkaria: https://www.tulankide.com/eu/papereko-edizioa

Zenbaki honek Errektore Kontseiluetan jarri du fokoa. Batzar Nagusiaren ondoren, kooperatibako organo gorena da Errektore Kontseilua.

Kooperatiba ezberdinetan organo horretako partaide diren protagonisten bizipenak jaso dira aldizkarian: Soraluce kooperatibako Mikel Peñak eta Eikako Antxone Aranzetak arduraz bizi dute kontseilukide izatea eta esperientzia aberasgarria dela diote. Beste hainbat kooperatibatako bizipenak ere jasotzen ditu erreportaje nagusiak: Ikerlan, Eroski, Mondragon Unibertsitatea, Fagor Automation eta LagunAro.

Elkarrizketak

Erreportaje nagusiko elkarrizketez gain, beste zenbait elkarrizketa interesgarri ere biltzen ditu aldizkariak. Arizmendi Ikastolako zuzendari berriek ikasturte honetan dituzten erronkak azaldu dituzte, Olatz Altuna Soziolinguistika Klusterreko ikerlariak kooperatibetan euskarak duen egoerari begira jarriko du irakurlea eta Mar Gaya Igualando ekimenaren sustatzaileak MONDRAGONen berdintasunaren inguruan egiten ari diren lanaren berri eman du.

Erreportajeak

Jose Maria Arizmendiarrietaren bizitza kontatzen eta kantatzen duen Hazia musikala irailean estreinatu zen Arrasaten eta haren gaineko kronika biltzen du aldizkariak. Bestetik, Embegaren 50. urteurrenaren harira, Villatuertako kooperatibaren nondik norakoak aurkituko ditu irakurleak aldizkarian.

Goian aipatutakoez gain, beste hainbat irakurgai, iritzi eta jakingarri izango ditu irakurleak TU Lankideren 622. zenbakian.

Ikus aldizkaria: https://www.tulankide.com/eu/papereko-edizioa