24 urte gidatzen

Iñakik egunero gozatzen du bere lanbideaz. “Funtsezkoa da gidatzean gozatzea eta pertsonekin tratatzeko trebetasunak izatea”, nabarmendu du, enpatiak eta kortesiak eguneroko errutinan duten garrantzia azpimarratuz. Baina txofer izatea bidaiariekin harreman ona izateaz gain, segurtasunarekiko konpromisoa ere bada. Era berean, puntualtasuna funtsezko ezaugarria da bere lanean, eta elkarrizketak hasteko gaitasuna oinarrizko trebetasun bihurtzen da, baita hurbiltasuna ere. Iñaki pertsona xumea da, bere lanaren erantzukizunaren jakitun. “Garrantzitsua da bizimodu ordenatua izatea eta lo-orduak kontuan hartzea. Atseden hartu behar da”, azpimarratu du.

Iñakiren egunak distantzia luzeen artean igarotzen dira, egunero 500-600 kilometro inguruko ibilbideekin. Batzuetan, goizeko lehen orduek markatzen dute lanaldiaren hasiera. “Egunean 8 orduz lan egiten dugu, eta lanaldia hasten dugun orduaren arabera, lehenago edo geroago amaituko dugu”, azaldu du.

Helmugak askotarikoak dira, baina ohikoenetako bat Loiuko (Bizkaia) aireportua da. “Oso ohikoa da Loiura joatea MONDRAGONeko kooperatibetako bezeroak edo langileak eramatera edo ekartzera”. Normalean, Iñakik eta lankideek honako kooperatibentzat eskaintzen dute zerbitzua: Fagor Taldeko kooperatibak, Kide, LKS, LagunAro eta LANA , besteak beste. Mezularitza- lanak ere egiten dituzte, eta dokumentazioa banatzen dute korporazioko kooperatiben artean.

Auto on baten garrantzia

Fagor Taldeko taxi zerbitzuko ibilgailuen flota lau Mercedes autok eta BMW batek osatzen dute, gama altuko automobilak, erosotasuna ez ezik ospea eta segurtasuna ere eskaintzen dutenak. Ibilgailuaren kalitatean ez ezik, eskuragarri dagoen zerbitzu teknikoan eta fidagarritasunean ere oinarritzen dira auto bat edo beste aukeratzerakoan. Gainerakoan, autoak zorrotz mantentzen dituzte Iñakik eta lankideek Fagor Taldearen bulegoen azpian duten garajean. “Autoa guk zaintzen dugu, beti distiratsu egon daitezen beharrezko garbiketak eta doikuntzak eginez”, gehitu du.

Esperientzien artean, Iñakik Mexikoko presidente ohi Salinas de Gortari eta Espainiako presidente ohi Leopoldo Calvo Soteloren semea bezalako pertsona ospetsuekin izandako topaketak gogoratzen ditu. Izen nabarmenak izan arren, “guztiek errespetu eta adeitasun tratu bera merezi dute”, gaineratu du.

Musika edo elkarrizketa?

Autoz egindako ibilbide batean bi aukera horien artean aukeratzeak asko esan dezake pertsona bati buruz. Kuriosoa da, oro har, inork ez duela ezer espezifikorik eskatzen; gidariaren nahierara geratzen da melodiak sintonizatzea edo solasaldietan murgiltzea. Batzuek isiltasuna aukeratzen dute, motorraren murmurioa eta gurpilen xuxurla asfaltoan bidaiaren soinu-banda bakarra izaten utziz. Hala ere, gurpil gaineko gela honetan, pertsona askok une ezin hobea aurkitzen dute telefono bidezko bilera bat antolatzeko, bidaia aprobetxatuz deiak egiteko eta gai garrantzitsuak eztabaidatzeko. Batzuek, ordea, ametsetan murgiltzeko aprobetxaten dute, eta autoa aterpe mugikor moduko bat bihurtzen dute, atsedena hartzeko.

Bere lanbideak etorkizun sendoa izatea espero du Iñakik. “Lanbideak etorkizuna izatea espero dugu. Zerbitzua ondo baloratuta dago”, dio baikor. Erretiroa hartzear dagoela, Iñaki Elejalde Elgeak pertsonak garraiatzetik harago doan lanbide bati eskaini dio bizitza: konexioak ehundu ditu, istorioen lekuko izan da eta Euskal Herrira lehen aldiz iristen diren pertsonei ongietorria ematen dien aurpegi lagunkoia izan da.